31 viktima deri sot, Rama tregon kur nisën përgatitjet e para kundër COVID-19

“Ne kemi filluar që në shkurt të përgatitemi dhe faktikisht kemi filluar mbledhjet e brendshme të strukturës së brendshme të sigurisë qysh në mes të shkurtit zyrtarisht…”

I ftuar në “Çim Peka LIVE” , kryeministri Edi Rama foli se kur e mori alertin e parë për pandeminë e Koronavirusit.

Sipas tij, qeveria ka qenë e përgatitur për virusin që në muajin shkurt.

Ju kanë gënjyer? Nuk ka patur komitet ekspertësh apo ka qenë më shumë komitet partie se sa ekspertë që merrnin vesh nga kjo punë?

“Sot jemi në kushte shumë të favorshme të dy sepse flasim me fakte. Nuk jemi në kushtet kur bëjmë parashikime dhe sot Shqipëria është sot një histori suksesi. Dhe ky sukses nuk ka ardhur nga qielli, por si kombinim i të gjithë elementëve. Që nga përgatitja jonë, që në shkurt.

Te strategjia e komunikimit që ka ardhur duke u intensifikuar. Sepse është shumë e rëndësishme që ta kesh publikun me vete. Jo ta futësh publikun në ankth e panik dhe ta motivosh para kohe.

Publiku motivohet në kohën e duhur si në një luftë, në një ndeshje dhe sot ajo që unë do doja të flisnim se çfarë kemi arritur e më pas të diskutonim se çfarë mund të kishim arritur më shumë. Po jo të diskutojmë tani çfarë the ti atëherë. Rezultatet janë shembullore dhe këtë nuk e mohon dot as Syri.net”, tha Rama.

Kur e keni marrë alertin e parë për këtë pandemi dhe për rrezikun që i kanosej Shqipërisë?

Ju thashë pra. Ne kemi filluar që në shkurt të përgatitemi dhe faktikisht kemi filluar mbledhjet e brendshme të strukturës së brendshme të sigurisë qysh në mes të shkurtit zyrtarisht. Me kërkesë të ministres së Shëndetësisë.

Le ti lemë këto çfarë bëmë apo nuk bëmë sipas parashikimeve tuaja apo sipas pretendimeve të mia. Faktet sot flasin qartë. Shqipëruia e ka përballuar këtë luftë, deri tani, fazën një, me sukses shembullor, spektakolar.