Pas rrëzimit të Kurtit, këta janë skenarët për formimin e qeverisë së re

Krasniqi theksoi se inicimi i mocionit të mosbesimit në këtë periudhë është veprim i gabuar.

Besimin që ia dha më 3 shkurt të këtij viti, Kuvendi i Kosovës qeverisë Kurti për të udhëhequr ekzekutivin, ia mori mbrëmë para mesnate duke e rrëzuar atë. Më 82 vota për, Kuvendi i Kosovës votoi mosbesimin ndaj qeverisë së Kosovës, të iniciuar nga partneri i koalicionit, Lidhja Demokratike e Kosovës. Qeveria tani është në detyrë dhe pritet që presidenti i vendit të procedojë tutje, duke i ftuar partitë politike që janë pjesë e Kuvendit për të gjetur mundësinë e krijimit të një qeverie e re, apo shpalljes së zgjedhjeve të jashtëzakonshme.

E meqenëse edhe në Kosovë, sikur në të gjithë botën është përhapur virusi COVID-19 dhe vendi ndodhet në gjendje emergjente shëndetësore, mbajtja e zgjedhjeve në këtë kohë nuk parashihet si opsion i afërt, veçse krijimi i një qeverisë gjithëpërfshirëse apo teknike.

Qeveria Kurti, e c ila u shkarkua nga Kuvendi i Kosovës, mbetet në detyrë deri në zgjedhjen e një qeverie të re, e cila do të bëhet qoftë nga zgjedhjet e reja apo përmes formimit të saj brenda legjislaturës ekzistuese.

Albert Kransiqi nga Demokracia Plus, shpjegoi për mundësitë kushtetuese që parashihen nga ana e presidentit në situata të tilla.

Ai tha se presidenti mund të fillojë menjëherë procedurat për të gjetur një kandidat të ri për të nominuar për kryeministër, e që së pari këtë duhet ta kërkojë nga Lëvizja Vetëvendosje, si partia e dalë fituese në zgjedhjet e fundit parlamentare.

Ai shtoi sse nëse Lëvizja Vetëvendosje e dërgon një kandidat të ri dhe gjen mbështetje prej shumicës së deputetëve, atëherë mund të vazhdojë mandatin e mbetur. Tjetër mundësi që presidenti e ka para vetes, Krasniqi tha se është shpërndarja e Kuvendit përmes dekretit.

Megjithatë, Krasniqi theksoi se inicimi i mocionit të mosbesimit në këtë periudhë kritike për vendin ishte veprim i gabuar. Sipas tij, është dashur të pritet të kalojë emergjenca shëndetësore dhe pastaj partnerët të provojë të gjejnë zgjidhje apo edhe të prishin koalicionin.

Ndërsa, analisti politik, Ramush Tahiri e sheh të mundshme formimin e një qeverie të re nga LDK, në bashkëpunim me Aleancën dhe Nismën.

Pasi Kuvendi rrëzoi mbrëmë qeverinë Kurti, kryeministri njoftoi se ka liruar nga detyra vartësin e tij të parë, që ishte nga LDK, Avdullah Hotin.

Ndërsa sot, kryetari i LDK-së, Isa Mustafa tha se nuk do t’i tërheq njëanshëm ministrat dhe zëvendësministrat nga detyra e tyre në qeverinë që ai e ka quajtur në dorëheqje.

Albert Krasniqi nga Demokracia Plus u shpreh se ministrat e LDK-së dhe Vetëvendosjes duhet të ruajnë frymën e bashkëpunimit në mes vete dhe të i sigurojnë një kontinuitet të qeverisë, dhe funksionalitet të saj, sepse në të kundërtën dëmtohen qytetarët në këtë kohë pandemie.

Ai tha se veprimi i Kurtit për të shkarkuar Hotin ishte i pamatur. Sot, një ditë pas rrëzimit të qeverisë, kryeministri Albin Kurti shkroi se do të vazhdojnë punën e tyre, meqë siç shkroi ai, janë qeveri me detyra dhe jo qeveri e detyruar.

Qeveria e Kosovës, në krye me Albin Kurtin u luhat për shkak të mos pajtimeve që ka pati me partnerin e koalicionit, LDK-në, lidhur me taksën 100%.

Problemet në mes tyre u theksuan edhe më shumë me veprimin e Kurtit, i cili shkarkoi nga posti i ministrit të Brendshëm, Agim Veliun e LDK-së. Kjo rezultoi me inicimin e një mocioni të mosbesimit nga LDK-ja, që më 25 mars u votua me 82 vota për, 32 kundër dhe një abstenim.