E shqetësuar për shëndetin e tij, Mbretëresha i çon mesazh të fejuarës së Boris Johnson

Mbretëresha dhe anëtarë të tjerë të familjes mbretërore britanike kanë dërguar mesazhe mbështetjeje për Boris Johnson për një “shërim të plotë dhe të shpejtë”, ndërsa ai lufton sot me koronavirusin në kujdesin intensiv.

Mbretëresha tha se urimet e saj ishin gjithashtu për të fejuarën shtatzanë të Kryeministrit, Carrie Symonds dhe familjen e tij, të cilët nuk janë në gjendje ta vizitojnë atë në Spitalin “St Thomas” në Londrën qendrore, shkruan “Daily Mail“.

Kjo ishte hera e tretë në më pak se 72 orë që Mbretëresha bën një deklaratë publike në lidhje me krizën e koronavirusit, pasi numri i vdekjeve u rrit me një rekord prej 854 vetash në një ditë.

“Buckingham Palace” tha në një deklaratë këtë pasdite: “Më herët Mbretëresha i dërgoi një mesazh Carrie Symonds dhe familjes Johnson. Madhëria e saj tha që ata ishin në mendimet e saj dhe se ajo i uroi Kryeministrit një shërim të plotë dhe të shpejtë”.

Në mesazhet e publikuara në të njëjtën kohë, Princi Charles dhe Camilla, si dhe Princi William dhe Kate Middleton, gjithashtu i dërguan mesazhe Kryeministrit ku i uronin më të mirat.

Mbretëresha i dha një mesazh shprese kombit të dielën në mbrëmje, pak më shumë se një orë përpara se “Downing Street” të njoftonte se Johnson ishte shtruar në spital.

Ajo paralajmëroi vendin se “mund të ketë akoma më shumë për të duruar”. Por ajo tha se nëse “mbetemi të bashkuar dhe të vendosur” përballë shpërthimit të koronavirusit “ne do ta kapërcejmë atë”.

Më parë të martën, Mbretëresha vlerësoi “përkushtimin ndaj shërbimit” të infermierëve, mamive dhe punonjësve të tjerë shëndetësorë gjatë shpërthimit të koronavirusit, në një mesazh për të shënuar Ditën Botërore të Shëndetit.

Ajo falënderoi profesionistët e kujdesit shëndetësor për “përkushtimin vetëmohues kur ndërmerrni role thelbësore të rëndësishme për të mbrojtur dhe përmirësuar shëndetin dhe mirëqenien e njerëzve në të gjithë botën”.