UBTech zbulon në Kinë robotët humanoidë ultra-realistë Uworld U1, të menduar për shoqërim afatgjatë

UBTech Robotics, kompani kineze, ka prezantuar një brez të ri robotësh humanoidë me “lëkurë biomimetike”, të aftë të kopjojnë shprehjet dhe deri në 90 për qind të lëvizjeve njerëzore. Këto modele janë menduar kryesisht për rolin e shoqëruesit personal dhe jo për përdorim si fuqi punëtore në industri.

Në një ngjarje të mbajtur në qendrën teknologjike të Shenzhenit, kompania bëri publikë robotët Uworld U1, të cilët i paraqiti si modelet e para ultra-realiste të këtij lloji që prodhohen në masë.

Sipas UBTech, për t’iu afruar sa më shumë njeriut, robotët janë veshur me një material të quajtur “lëkurë biomimetike”, i projektuar për të riprodhuar sa më besnikërisht pamjen dhe ndjesinë e lëkurës së njeriut.

Kompania thotë se, falë një strukture të veçantë të “shtyllës kurrizore” dhe nyjave të avancuara, këta robotë mund të realizojnë rreth 90 për qind të lëvizjeve të trupit njerëzor.

Modele mashkullore dhe femërore

Versioni mashkullor i robotit ka gjatësi 183 centimetra, ndërsa modeli femëror arrin 169 centimetra.

Pesha e tyre është afërsisht sa gjysma e peshës së një njeriu mesatar me të njëjtën gjatësi.

UBTech i ofron këta robotë në tri variante: një model bazë që përfshin vetëm pjesën e sipërme të trupit dhe dy versione të plota me veçori më të avancuara.

Raportohet se çmimet fillojnë nga rreth 120 mijë juanë, ose afërsisht 13 mijë funte, ndërsa versionet më të sofistikuara mund të arrijnë deri në 990 mijë juanë, pra mbi 109 mijë funte.

Të projektuar si shoqërues, jo si punëtorë fabrike

Në dallim nga shumica e robotëve humanoidë që zhvillohen për ambiente fabrike dhe procese industriale, Uworld U1 është krijuar para së gjithash për t’u përdorur si shoqërues personal.

Themeluesi i UBTech, Zhou Jian, e cilësoi këtë nismë si etapën e ardhshme të “simbiozës mes njeriut dhe makinës”.

“Fillimisht robotët punojnë në fabrika, më pas hyjnë në shtëpitë tona dhe në fund integrohen pa pengesa në jetën tonë”, deklaroi ai.

Për të realizuar këtë vizion, kompania është përpjekur që robotët të kenë një pamje dhe sjellje sa më natyrale.

88 nyja dhe mijëra pjesë në fytyrë

Robotët janë të pajisur me 88 nyja që kontrollohen nga motorë precizë, me një sistem të dyfishtë rrotullimi në qafë dhe me mijëra komponentë të vegjël në kokë që shërbejnë për riprodhimin e shprehjeve të fytyrës.

Jiao Jichao, nënpresident i UBTech dhe drejtues i institutit të kompanisë për inteligjencën e mishëruar dhe robotikën humanoide, tha se fytyra përbënte një nga pengesat më të mëdha teknike.

Ai shpjegoi se sfida kryesore ishte vendosja e sistemeve të ndërlikuara mekanike brenda një trupi me përmasa njerëzore, pa e bërë robotin të dukej i ngurtë apo artificial.

Sfida tjetër, sipas tij, ishte që shprehjet e fytyrës të sinkronizoheshin me të folurin dhe emocionet, duke ruajtur të njëjtin standard edhe në prodhimin masiv.

Inteligjencë artificiale për shoqërim afatgjatë

Secili robot vjen me një sistem të integruar të inteligjencës artificiale, i ndërtuar posaçërisht për “shoqërim afatgjatë”.

UBTech pretendon se ky sistem është në gjendje të identifikojë më shumë se 20 gjendje të ndryshme emocionale, me saktësi mbi 90 për qind.

Sipas përfaqësuesve të kompanisë, roboti mund të mbajë biseda, të ruajë kontaktin me sy dhe të reagojë ndaj gjendjes emocionale të përdoruesit.

Modelet do t’u shiten vetëm të rriturve.

Mbi 13 mijë porosi paraprake

UBTech ka bërë të ditur se 13.361 persona kanë paguar tashmë një depozitë prej 3 mijë juanësh për t’u përfshirë në listën e porosive paraprake.

Kompania ka njoftuar edhe se deri në fund të vitit do të dhurojë 100 robotë për grupe të cenueshme.

Në këtë program përfshihen fëmijët që rriten larg njërit ose të dy prindërve, të moshuarit që jetojnë vetëm dhe familjet që përballen me rrethana të vështira.

Reagime të ndara në rrjetet sociale

Dalja e tyre në publik gjeneroi shumë reagime në internet.

Një pjesë e përdoruesve u mahnitën nga pamja dhe niveli teknologjik, duke i krahasuar robotët me personazhe të filmave fantastiko-shkencorë.

Të tjerë e vlerësuan faktin që një shkallë e tillë realizmi dhe inteligjence emocionale po kalon në prodhim masiv.

Megjithatë, pati edhe shumë komentues që u ndien të shqetësuar nga pamja e tyre dhe ngritën dyshime për dobishmërinë praktike.

Disa i përshkruan si manekinë me mikrofon dhe inteligjencë artificiale, ndërsa të tjerë bënë shaka me frikën se mund të kthehen në rrezik për pronarët e tyre.

Incidentet e mëparshme ngrenë pikëpyetje për sigurinë

Ky prezantim vjen pas disa episodeve virale që kanë përfshirë robotë humanoidë në Kinë.

Në muajin mars, një robot i kompanisë Unitree goditi pa dashje një djalë të vogël gjatë një shfaqjeje në provincën Shaanxi.

Gjatë performancës, ai iu afrua turmës me lëvizje të gjera të krahëve dhe, teksa u rrotullua, e goditi fëmijën në kokë.

Në një aktivitet sportiv në rajonin Xinjiang, një robot tjetër po demonstronte lëvizje të arteve marciale, por u rrëzua pasi disa fëmijë hynë në fushë, duke vazhduar të kryente goditje të pakontrolluara me këmbë.

Këto raste kanë shtuar shqetësimet për sigurinë, sidomos nëse robotët humanoidë do të përdoren në shtëpi pranë fëmijëve, të moshuarve dhe personave të cenueshëm.

Megjithatë, UBTech beson se Uworld U1 shënon një hap të rëndësishëm drejt një të ardhmeje ku robotët nuk do të shërbejnë vetëm si mjete pune, por edhe si pjesë e jetës së përditshme të njerëzve. /GazetaExpress/