MySpace synon një rikthim të ri, por a mund të sfidojë TikTok-un dhe Instagram-in?

Myspace, rrjeti social që dikur kryesonte popullaritetin në mbarë botën, mund të vihet sërish në funksion. Pronarët e tij besojnë se nostalgjia dhe lodhja e përdoruesve nga algoritmet mund ta favorizojnë këtë rikthim, ndonëse analistët i konsiderojnë të pakta gjasat për sukses në treg.

Platforma u krijua në vitin 2003 nga Tom Anderson dhe Chris DeWolfe. Sipas CNBC, në vitin 2008 ajo regjistronte rreth 115 milionë vizitorë çdo muaj.

Ndër veçoritë që e dallonin Myspace-in ishin profilet që mund të personalizoheshin plotësisht, pamja e pazakontë dhe Tom Anderson, i cili shtohej automatikisht si miku i parë i çdo anëtari të ri.

Në vitin 2011, Myspace u ble nga vëllezërit Tim dhe Chris Vanderhook. Më pas, ata tentuan ta përshtatnin platformën me kohën, me synimin që ajo të përballej me zgjerimin e jashtëzakonshëm të Facebookut.

Kjo përpjekje nuk dha rezultat. Megjithëse në atë periudhë humbën 150 milionë dollarë, vëllezërit Vanderhook deklarojnë se janë ende në pritje të çastit të përshtatshëm për ta rikthyer platformën.

Në mënyrë paradoksale, një mundësi e re për Myspace-in mund të shfaqet pikërisht tani, kur përdoruesit po ngrenë sërish pikëpyetje mbi modelin e rrjeteve sociale që dikur e largoi atë nga tregu.

Sot, Instagrami, TikToku, Facebook-u dhe platformat e tjera të mëdha ndërtohen kryesisht rreth algoritmeve, videove të shkurtra dhe përpjekjeve të pandërprera për të mbajtur vëmendjen e publikut. Kjo qasje ka nisur të shkaktojë lodhje te një pjesë e përdoruesve.

Gjithnjë e më shumë pjesëtarë të brezit të mijëvjeçarëve dhe të Gjeneratës Z po kërkojnë të kalojnë më pak kohë në rrjetet sociale, duke preferuar komunitete digjitale më të vogla. Një prirje e tillë mund t’i hapë rrugë rikthimit të Myspace-it.

Pavarësisht kësaj mundësie, ekspertët parashikojnë vështirësi të mëdha nëse Myspace synon të shndërrohet përsëri në një platformë që prodhon fitim.

Ata që e mbajnë mend rrjetin social tashmë janë të rritur dhe kanë punë e familje. Për këtë arsye, mbetet e paqartë nëse do të ishin të gatshëm të ktheheshin dhe të publikonin rregullisht materiale në një platformë tjetër sociale.

Nga ana tjetër, brezi i ri, i cili nuk e ka përjetuar versionin fillestar të Myspace-it, kërkon përdorim më të thjeshtë, gjetje të shpejtë të përmbajtjeve dhe formate me video të shkurtra.

Një tjetër sfidë lidhet me reklamuesit, të cilët tërhiqen më me vështirësi nga platformat e vogla dhe të mesme. Raste si ai i aplikacionit Bluesky dëshmojnë se interesi i madh i fillimit mund të venitet shpejt, duke u pasuar nga një tkurrje e ndjeshme e përdoruesve aktivë.

Planet për ringjalljen e Myspace-it vijnë gjithashtu në një periudhë kur, në vende të ndryshme të botës, po zbatohen kufizime dhe rregulla më të forta për përdorimin e rrjeteve sociale nga të miturit. Kjo rrethanë e bën edhe më të ndërlikuar strategjinë për zgjerimin e platformës.