MySpace synon një rikthim të madh, por a mund të rivalizojë TikTok-un dhe Instagram-in?

Myspace, rrjeti social që dikur kryesonte popullaritetin në mbarë botën, mund të riaktivizohet. Pronarët e tij besojnë se nostalgjia dhe pakënaqësia në rritje ndaj algoritmeve mund ta favorizojnë këtë rikthim, ndonëse analistët i konsiderojnë të kufizuara mundësitë për sukses në treg.

Platforma u krijua në vitin 2003 nga Tom Anderson dhe Chris DeWolfe. Sipas CNBC, në vitin 2008 ajo regjistronte rreth 115 milionë vizitorë çdo muaj.

Ndër veçoritë që e dallonin Myspace-in ishin mundësia për personalizimin e plotë të profileve dhe pamja e tij jo e zakonshme. Një tjetër element karakteristik ishte Tom Anderson, i cili shtohej automatikisht si miku i parë i çdo përdoruesi të saporegjistruar.

Në vitin 2011, Myspace u ble nga vëllezërit Tim dhe Chris Vanderhook. Më pas, ata ndërmorën përpjekje për ta përshtatur platformën me zhvillimet e kohës, me synimin që ajo të përballej me zgjerimin e jashtëzakonshëm të Facebookut.

Kjo përpjekje për modernizim dështoi dhe vëllezërit Vanderhook humbën 150 milionë dollarë në atë periudhë. Megjithatë, ata deklarojnë se vazhdojnë të presin çastin e përshtatshëm për ta rikthyer platformën.

Në mënyrë paradoksale, mundësia për ringjalljen e Myspace-it po shfaqet pikërisht kur përdoruesit kanë nisur të vënë sërish në diskutim modelin e rrjeteve sociale që dikur e largoi atë nga tregu.

Sot, Instagrami, TikToku, Facebook-u dhe rrjetet e tjera kryesore funksionojnë kryesisht përmes algoritmeve, videove të shkurtra dhe mekanizmave të pandërprerë për të mbajtur vëmendjen. Kjo mënyrë përdorimi po krijon lodhje te një pjesë e publikut.

Gjithnjë e më shumë pjesëtarë të brezit të mijëvjeçarëve dhe të Gjeneratës Z po kërkojnë ta pakësojnë kohën që kalojnë në rrjetet sociale. Prirja e tyre drejt komuniteteve digjitale më të vogla mund t’i hapë një dritare mundësie Myspace-it.

Pavarësisht këtij skenari, ekspertët theksojnë se rrjeti do të ndeshet me vështirësi të mëdha nëse kërkon të shndërrohet përsëri në një platformë që gjeneron fitim.

Personat që e mbajnë mend Myspace-in tashmë janë të rritur dhe kanë punë e familje. Për këtë arsye, mbetet e paqartë nëse ata do të ishin të gatshëm të riktheheshin dhe të krijonin rregullisht përmbajtje në një rrjet tjetër social.

Nga ana tjetër, përdoruesit më të rinj, të cilët nuk e kanë përjetuar versionin fillestar të Myspace-it, kërkojnë ndërfaqe më të lehta për t’u përdorur, gjetje të shpejtë të materialeve dhe video në formate të shkurtra.

Një tjetër problem lidhet me reklamuesit, të cilët tërhiqen më me vështirësi nga platformat e vogla dhe të mesme. Raste si ai i aplikacionit Bluesky dëshmojnë se interesi i fortë i fillimit mund të bjerë brenda një kohe të shkurtër, duke u pasuar nga një tkurrje e ndjeshme e numrit të përdoruesve aktivë.

Planet për rikthimin e Myspace-it vijnë gjithashtu në një periudhë kur vende të ndryshme në botë po miratojnë kufizime dhe rregulla më të ashpra për përdorimin e rrjeteve sociale nga të miturit. Këto zhvillime e bëjnë edhe më të ndërlikuar strategjinë për rritjen e platformës.