MySpace paralajmëron ringjalljen, a mund t’ua kalojë TikTok-ut dhe Instagram-it?

Rrjeti dikur më i madh social në planet, MySpace, po sinjalizon një rikthim të mundshëm, duke u mbështetur te ndjenja e nostalgjisë dhe te ngopja që po shfaqin njerëzit ndaj logjikës së algoritmeve. Megjithatë, specialistët e industrisë nuk janë optimistë për gjasat e tij për të triumfuar në tregun aktual.

I krijuar më 2003 nga dyshja Tom Anderson dhe Chris DeWolfe, MySpace arriti kulmin në vitin 2008 me afro 115 milionë vizitorë çdo muaj, sipas të dhënave të CNBC.

Platforma dallohej për profilet tejet të personalizueshme, një estetikë jokonvencionale dhe figurën e Tom Anderson, i cili shfaqej automatikisht si miku i parë i secilit anëtar të sapo regjistruar.

Në vitin 2011, vëllezërit Tim dhe Chris Vanderhook morën në pronësi MySpace dhe u angazhuan për ta përtërirë atë, me synimin për t’i bërë konkurrencë rritjes marramendëse të Facebook-ut.

Kjo nismë dështoi, dhe megjithëse humbën rreth 150 milionë dollarë në atë periudhë, vëllezërit Vanderhook pohojnë se janë në pritje të çastit të favorshëm për ta rikthyer shërbimin në skenë.

Ironia e situatës është se MySpace mund të rilindë pikërisht tani, kur audienca po sfidon sërish tipin e rrjeteve sociale që dikur e nxorën jashtë loje.

Platformat dominuese si Instagram, TikTok dhe Facebook funksionojnë sot mbi bazën e algoritmeve, videove të shkurtra dhe garës së pandërprerë për kapjen e vëmendjes, një dinamikë që po shkakton një farë rraskapitjeje te një segment përdoruesish.

Një numër në rritje i pjesëtarëve të gjeneratës së mijëvjeçarit dhe asaj Z po synojnë të kufizojnë kohën në ekran dhe po migrojnë drejt komuniteteve më të vogla virtuale, çka potencialisht krijon një hapësirë për rikthimin e MySpace.

Megjithatë, analistët mendojnë se platforma do të ndeshet me barriera të forta në rrugën për t’u bërë sërish një sipërmarrje fitimprurëse.

Ata që e mbajnë mend sot MySpace janë njerëz të rritur, me karrierë dhe detyrime familjare, dhe mbetet për t’u parë nëse do të ishin të gatshëm të riktheheshin e të publikonin rregullisht materiale në një tjetër rrjet social.

Nga ana tjetër, brezi i ri, të cilët nuk e kanë provuar asnjëherë versionin origjinal të MySpace, kërkojnë një eksperiencë më të thjeshtë përdorimi, zbulim të menjëhershëm të asaj që u intereson dhe formate të shpejta video.

Një tjetër sfidë është se rrjetet e vogla dhe të mesme e kanë të ndërlikuar të joshin investitorët për reklama. Rastet si ai i Bluesky ilustrojnë qartë se si entuziazmi fillestar mund të venitet me shpejtësi, i ndjekur nga një tkurrje e ndjeshme e përdoruesve aktivë.

MySpace synon të ringjallet në një epokë ku shtete të ndryshme po aplikojnë legjislacione gjithnjë e më të ashpra dhe kufizime për të miturit në botën digjitale, një faktor që e bën edhe më të vështirë hartimin e një plani për zgjerimin e platformës.