Meta zbulon Muse Charm, pajisjen kompakte për komunikim me inteligjencën artificiale

Meta ka nxjerrë në dritë Muse Charm, një pajisje e vogël që u lejon përdoruesve të ndërveprojnë me inteligjencën artificiale të kompanisë pa përdorur telefonin ose kompjuterin.

Mark Zuckerberg e prezantoi pajisjen në përfundim të eventit Meta Connect, duke e përshkruar si një produkt të krijuar për të qenë vazhdimisht gati për përdorim.

Përmasat e Muse Charm janë aq të vogla sa pajisja mund të mbahet në pëllëmbë dhe të vendoset edhe në një varëse çelësash. Për ta aktivizuar, përdoruesi duhet vetëm të shtypë sensorin e gjurmës së gishtit në cep dhe të nisë bisedën, pa zhbllokuar telefonin apo hapur një aplikacion.

Meta ende nuk ka dhënë shumë të dhëna teknike për produktin. Megjithatë, forma dhe ideja pas tij kanë nxitur krahasime në rrjetet sociale me Tamagotchi-n, lodrën digjitale që u bë e njohur gjatë viteve ’90.

Reagimet kanë qenë të ndryshme: disa përdorues e kanë pritur me humor, ndërsa të tjerë kanë vënë në dyshim nevojën për një pajisje të veçantë të inteligjencës artificiale, kur telefonat dhe orët inteligjente tashmë ofrojnë funksione të ngjashme.

Çfarë është Muse?

Fokusi kryesor i Meta Connect ishte Muse, të cilin kompania e cilëson si një “agjent personal të inteligjencës artificiale”.

Zuckerberg bëri të ditur fillimisht se Muse do të vendosej në syzet inteligjente të Meta-s. Përmes tij, përdoruesit mund të krijojnë dhe të ndjekin programe të personalizuara stërvitjeje, të regjistrojnë vaktet, të marrin të dhëna ushqyese dhe të kërkojnë ndihmë për blerjen e produkteve që shohin pranë tyre.

Asistenti mund të kryejë edhe veprime të përditshme, përfshirë rezervimin e takimeve, kontrollin e çmimeve të fluturimeve dhe kërkimin e një produkti ose pjese specifike.

Sipas Meta-s, këto detyra mund të kërkohen gjatë vozitjes, gatimit ose vrapimit, pa qenë e nevojshme që përdoruesi të nxjerrë telefonin. Aktivizimi bëhet edhe duke thënë emrin “Muse” dhe më pas duke dhënë komandën.

Pas marrjes së kërkesës, asistenti mund të vazhdojë të funksionojë në sfond dhe ta lajmërojë përdoruesin pasi ta ketë përfunduar detyrën.

Muse Charm e sjell AI-n në një pajisje që mbahet me vete

Në pjesën e fundit të prezantimit, Zuckerberg sqaroi se përdorimi i Muse nuk do të kufizohet te syzet inteligjente, pasi asistenti do të jetë i disponueshëm edhe nëpërmjet Muse Charm.

“Ne kemi futur shumë teknologji brenda kësaj pajisjeje të vogël”, deklaroi ai ndërsa ia tregonte produktin publikut.

Sipas Zuckerbergut, për njerëzit që nuk përdorin syze inteligjente, pajisja e re mund të përbëjë mënyrën më të shpejtë për të komunikuar me asistentin AI dhe për t’i përshkruar atij çfarë po ndodh në mjedisin përreth.

Fotografitë dhe videot e publikuara deri tani sugjerojnë se Muse Charm ka një ekran të vogël, ku shfaqet avatari i përzgjedhur i Muse. Në njërin cep gjendet sensori i gjurmës së gishtit, që shërben për aktivizimin e asistentit.

Deri më tani, Meta ka ndërtuar vetëm disa prototipe të pajisjes. Zuckerberg tha se kompania duhet ende të përzgjedhë materialet dhe të përcaktojë vendosjen përfundimtare të komponentëve të brendshëm.

Pavarësisht kësaj, objektivi i kompanisë është që Muse Charm të dalë në treg në muajin dhjetor, në kohë për sezonin e festave.

Reagime të ndryshme në rrjetet sociale

Prezantimi i Muse Charm ka sjellë një numër të madh reagimesh në platformat sociale.

Disa përdorues e kanë renditur pajisjen ndër mënyrat më interesante për përdorimin e inteligjencës artificiale dhe kanë ngritur pyetjen nëse ajo mund të konkurrojë me produkte të kompanive si Apple.

Një pjesë tjetër e publikut e ka parë si një version modern të Tamagotchi-t. Ndërkohë, nuk kanë munguar as kritikat për dobishmërinë e saj.

Disa komentues kanë pyetur se përse do të zgjidhej Muse Charm në vend të një telefoni ose Apple Watch.

Shqetësime të tjera lidhen me privatësinë dhe me praninë gjithnjë e më të madhe të pajisjeve me inteligjencë artificiale në jetën e përditshme. Një reagim tjetër e krahasoi këtë ide me serialin distopik “Black Mirror”.

Meta nuk ka njoftuar ende se sa do të kushtojë Muse Charm. /GazetaExpres/