LIVE/ Në ditën e 82-të të protestës, qytetarët kërkojnë largimin e Ramës

Një analizë e kryer nga AI Detector mbi më shumë se një milion këngë të publikuara gjatë korrikut tregoi se 23.2 përqind e tyre ishin krijuar tërësisht nga inteligjenca artificiale.

Sipas një studimi të ri, rreth 40 përqind e muzikës së publikuar në mbarë botën gjatë korrikut të këtij viti është prodhuar pjesërisht ose plotësisht me ndihmën e inteligjencës artificiale (IA).

Të dhënat janë bërë publike nga platforma muzikore online SubmitHub.

Detektori i inteligjencës artificiale i kësaj platforme shqyrtoi mbi një milion këngë të publikuara gjatë korrikut. Nga analiza rezultoi se 23.2 përqind e tyre ishin gjeneruar plotësisht nga IA.

Një tjetër 15.3 përqind e publikimeve përmbanin elemente audio të krijuara nga inteligjenca artificiale, të cilat më pas ishin “redaktuar ose përpunuar” nga njerëzit. Kjo nënkupton se 38.5 përqind e të gjithë muzikës së publikuar muajin e kaluar ishte realizuar në një masë të caktuar me ndihmën e teknologjisë së IA-së, raporton Vijesti.me.

SubmitHub, që u mundëson përdoruesve të propozojnë muzikë për lista dëgjimi dhe blogje muzikore, prezantoi në fillim të kësaj vere mjetin e vet për identifikimin e përmbajtjes së krijuar nga inteligjenca artificiale, SH Labs. Funksioni synon të vërë në pah “problemin në rritje të transparencës” lidhur me përdorimin e IA-së në muzikë.

Themeluesi i SubmitHub, Jason Griskoff, tha se transparenca është rruga që duhet ndjekur për muzikën e krijuar nga inteligjenca artificiale.

“Mendoj se rruga përpara për muzikën e IA-së është transparenca. Njerëzit duhet të vendosin vetë nëse duan të dëgjojnë muzikë të gjeneruar nga IA. Detyra jonë është t’u japim atyre informacion të mjaftueshëm për të marrë këtë vendim.”

Mjeti për zbulimin e përmbajtjes së prodhuar nga inteligjenca artificiale përdoret edhe nga platforma si Bandcamp dhe Traxsource, si dhe nga GEMA. Kjo e fundit është një organizatë e të drejtave të autorit që muajin e kaluar fitoi një çështje gjyqësore historike kundër Suno, platformës që krijon muzikë përmes inteligjencës artificiale.

Në fillim të këtij viti, Bandcamp ndaloi çdo muzikë të krijuar me teknologjinë e inteligjencës artificiale. Platforma deklaroi se “rezervon të drejtën për të hequr çdo muzikë që dyshon se është gjeneruar duke përdorur inteligjencën artificiale”.

Edhe Beatport ndërmori një hap të ngjashëm javën e kaluar, duke premtuar “transparencë më të madhe” për dëgjuesit dhe duke “mbrojtur kreativitetin njerëzor”.

Më herët gjatë kësaj vere, TIDAL bëri të ditur një politikë të re kundër muzikës së krijuar nga inteligjenca artificiale. Shërbimi online konfirmoi se nuk do të paguajë honorare për përmbajtjen e prodhuar tërësisht nga IA.

Ndërkohë, Spotify është duke vendosur një sistem të ri etiketimi, përmes të cilit përdoruesit do të mund të dallojnë më lehtë artistët dhe përmbajtjen e krijuar me këtë teknologji.

Deezer njoftoi se muzika e gjeneruar nga inteligjenca artificiale tashmë përbën mbi 50 përqind të gjithë përmbajtjes që ngarkohet në platformë çdo ditë.

Apple Music kishte bërë më herët të ditur planet për t’i informuar përdoruesit kur ata dëgjojnë muzikë të krijuar me ndihmën e inteligjencës artificiale.