LIVE – Kuvendi vijon seancën, qytetarët nuk ndalin protestën jashtë pavarësisht dhunës së policisë

Në pesë vitet e fundit, automjetet elektrike janë bërë ndjeshëm më të përballueshme në Evropë. Një analizë e tregut evropian parashikon se, deri rreth vitit 2030, çmimet e tyre mund të barazohen me ato të makinave me motor me djegie.

Studimi, i realizuar nga Instituti Fraunhofer i Gjermanisë për Kërkime në Sisteme dhe Inovacion (ISI) dhe Këshilli Ndërkombëtar për Transport të Pastër (ICCT), tregoi se çmimet e listuara të makinave elektrike u ulën me 18% nga viti 2020 deri në vitin 2025, pasi u mor parasysh inflacioni.

Në të njëjtën periudhë, çmimet e listuara të automjeteve me motor me djegie shënuan një rritje prej 2% në terma të përshtatur me inflacionin. Sipas studimit, ky ndryshim e ka zhvendosur dukshëm koston reale për kilometër në favor të makinave elektrike.

Tregu i automjeteve elektrike ka arritur një nivel më të lartë pjekurie.

Peter Mock nga ICCT tha se gjetjet dëshmojnë për zhvillimin e konsiderueshëm të këtij tregu gjatë viteve të fundit. Sipas tij, makinat elektrike ofrojnë tashmë, mesatarisht, autonomi më të madhe dhe motorë më të fuqishëm, ndërsa çmimet reale të modeleve të krahasueshme janë ulur.

Në kuadër të analizës, studiuesit shqyrtuan më shumë se 100,000 pika individuale të dhënash, të marra nga baza e të dhënave e ADAC-it gjerman, klubit më të madh të automobilave në Evropë.

Për të siguruar një krahasim të drejtë, ekipi nuk u kufizua te përllogaritja e çmimeve mesatare të të gjitha makinave elektrike dhe të të gjitha automjeteve me motor me djegie të brendshme. Kjo metodë do të ishte problematike, pasi oferta e modeleve elektrike është zgjeruar gjatë viteve të fundit, sidomos në segmentin e lartë të tregut.

Patrick Plötz, profesor në ISI, shpjegoi se zgjerimi i ofertës ka ndikuar në rritjen e çmimit mesatar, por theksoi se bëhet fjalë për automjete shumë të ndryshme. Ai tha se një krahasim i tillë do të ishte si të krahasoheshin qershitë me mollët, ndaj studiuesit u përpoqën të ndiqnin në kohë makina të njëjta ose modele të krahasueshme.

Kur u zbatua kjo metodë, çmimet e listuara të makinave elektrike rezultuan relativisht të qëndrueshme, ndërsa ato të automjeteve me motor me djegie të brendshme u shtrenjtuan.

Barazimi i çmimeve mund të arrihet deri në vitin 2030.

Sipas Plötz, ka ende hapësirë që ecuria e çmimeve të jetë më e favorshme për makinat elektrike. Ai vuri në dukje se ulja e kostos së baterive nuk është reflektuar ende plotësisht, ndërsa rritja e prodhimit dhe presioni ndaj prodhuesve për shkak të kufizimeve të emetimeve të CO2 pritet të ndikojnë gjithashtu.

Plötz deklaroi se, nëse prirja aktuale ruhet, rreth vitit 2030 makinat elektrike në Evropë mund të kenë të njëjtin çmim si automjetet e krahasueshme me motor me djegie.

Ai shtoi se, për sa i përket kostos së përgjithshme për kilometër, automjetet elektrike do të ishin dukshëm më të lira. Përvoja në tregje të tjera ka treguar se, kur çmimet barazohen, makinat elektrike mund të sigurojnë rreth 50% të pjesës së tregut.

Analiza është mbështetur te çmimet e listuara dhe jo te vlerat reale të transaksioneve, kryesisht sepse këto të fundit nuk gjenden në të njëjtën shkallë. Megjithatë, autorët nënvizuan se kjo zgjedhje nuk pritet të ketë shkaktuar shtrembërime të rëndësishme.

Të dhënat e ekspertit të industrisë Ferdinand Dudenhöffer për ecurinë e zbritjeve të makinave elektrike tregojnë se, gjatë viteve të fundit, zbritjet për modelet kryesore elektrike kanë ndjekur të paktën një prirje të përgjithshme rritëse. Ky element do ta forconte më tej efektin në favor të automjeteve elektrike, sipas DPA News.