Komisioni Evropian vendos gjobë prej 890 milionë eurosh ndaj Google për shkelje të rregullave të konkurrencës dixhitale

Gjiganti teknologjik Google është ndëshkuar nga Bashkimi Evropian me një gjobë prej 890 milionë eurosh (rreth 1 miliard dollarë). Sipas autoriteteve të Brukselit, kompania ka manipuluar pozicionimin e dyqanit të aplikacioneve Google Play dhe motorit të vet të kërkimit për të orientuar përdoruesit drejt shërbimeve dhe aplikacioneve të saj, duke dëmtuar kështu rivalët në kundërshtim me Aktin e Tregjeve Dixhitale.

Ky veprim përfaqëson goditjen më të re të BE-së ndaj korporatave të mëdha të teknologjisë, teksa Brukseli forcon qëndrimin e tij të ashpër ndaj kompanive dominuese nga Silicon Valley e deri në Pekin.

Njoftimi vjen pas një hetimi të thelluar nga organi ekzekutiv i unionit mbi praktikat e supozuara monopolistike të Google. Teresa Ribera, nënkryetarja e Komisionit Evropian përgjegjëse për tranzicionin e pastër, të drejtë dhe konkurrues, deklaroi se suksesi i produkteve më cilësore duhet të vijë si pasojë e epërsisë së tyre, jo për shkak se ato janë pronë e kompanisë që menaxhon motorin e kërkimit. Ajo shtoi se konsumatorët evropianë kanë të drejtën që zhvilluesit e aplikacioneve t’i udhëzojnë drejt ofertave më të volitshme, edhe në rastet kur pronari i dyqanit të aplikacioneve nuk përfiton një komision.

Ndërkohë, Google sapo ka pësuar një humbje në apelin e saj kundër një gjobe tjetër prej 4.5 miliardë dollarësh, e vendosur për shkelje të rregullave antitrust të BE-së. Ajo gjobë lidhej me pengimin e konkurrencës dhe kufizimin e zgjedhjeve të konsumatorit nëpërmjet dominimit të sistemit operativ Android.

Nga ana tjetër, Kent Walker, presidenti i çështjeve globale në Google, e ka kundërshtuar ashpër masën e re. Ai e cilësoi gjobën si një veprim që do të ulë cilësinë e produktit, i nxitur nga një grup i vogël ankuesish me interesa personale, dhe paralajmëroi për pasoja negative për bizneset dhe qytetarët evropianë. Sipas tij, Akti i Tregjeve Dixhitale e detyron Google të çaktivizojë funksionet e kërkimit në kohë reale, të tilla si çmimet e menjëhershme dhe disponueshmëria e drejtpërdrejtë për hotele, fluturime dhe restorante, si dhe do të eliminojë veçori të sigurisë së Google Play.

Brukseli ka rritur presionin mbi gjigantët amerikanë dhe kinezë të teknologjisë, pavarësisht rreziqeve për të zemëruar administratën e Presidentit amerikan Donald Trump. Ai e ka kritikuar hapur kuadrin rregullator dixhital të bllokut dhe është zotuar për masa hakmarrëse nëse ndëshkohen firmat amerikane.

Bashkimi Evropian i konsideron shtatë kompanitë më të fuqishme globale të teknologjisë si “rojtarë” të aksesit të konsumatorëve. Këtu përfshihen Amazon, Apple, Alphabet (pronarja e Google), Meta, Microsoft dhe ByteDance (pronarja e TikTok). Thomas Regnier, zëdhënës i Komisionit Evropian, theksoi se në BE kompanitë kanë të drejtën e konkurrencës së ndershme dhe se kontrolluesit e portave kanë detyrimin të sigurojnë kushte të barabarta që konsumatorët të kenë mundësi të zgjedhin alternativa më të lira.