Google ndëshkohet nga BE-ja me 890 milionë euro për shkeljen e Aktit të Tregjeve Dixhitale

Google është gjobitur nga Bashkimi Evropian me 890 milionë euro (1 miliard dollarë), pasi u konstatua se kompania teknologjike kishte shkelur Aktin e Tregjeve Dixhitale. Sipas BE-së, mënyra se si janë pozicionuar Google Play dhe motori i kërkimit i orienton përdoruesit drejt aplikacioneve dhe shërbimeve të vetë kompanisë, duke dëmtuar rivalët.

Vendimi përbën masën më të fundit të Brukselit kundër kompanive të mëdha të teknologjisë. BE-ja ka udhëhequr përpjekjet globale për ashpërsimin e kontrollit ndaj disa prej korporatave më të fuqishme në botë, nga Silicon Valley deri në Pekin.

Komisioni Evropian, organi ekzekutiv i BE-së, deklaroi se ndërhyrja synon mbrojtjen e konsumatorëve dhe pason një hetim mbi sjelljen monopolistike të Google.

“Produktet më të mira duhet të kenë sukses sepse janë më të mira, jo sepse janë në pronësi të kompanisë që operon motorin e kërkimit. Dhe konsumatorët evropianë kanë të drejtë që zhvilluesit e aplikacioneve t’u tregojnë se ku të regjistrohen për ofertat më të mira, edhe kur pronari i dyqanit të aplikacioneve nuk merr një përqindje”, tha Teresa Ribera, nënkryetare e Komisionit Evropian për një tranzicion të pastër, të drejtë dhe konkurrues.

Në reagimin e tij, presidenti i çështjeve globale të Google, Kent Walker, e kundërshtoi gjobën. Ai pretendoi se vendimi, i ndikuar nga një grup paditësish me interesa vetjake, do ta përkeqësonte produktin dhe do të sillte pasoja negative për kompanitë dhe konsumatorët në Evropë.

Sipas Walker, Akti i Tregjeve Dixhitale i BE-së e detyron Google-in të ndërpresë funksionet e kërkimit në kohë reale që preferohen nga evropianët, përfshirë çmimet e menjëhershme dhe informacionin e drejtpërdrejtë mbi disponueshmërinë e hoteleve, fluturimeve dhe restoranteve. Ai tha gjithashtu se zbatimi i tij do të hiqte veçoritë e sigurisë së Google Play.

Presioni i Brukselit ndaj gjigantëve teknologjikë amerikanë dhe kinezë është rritur, pavarësisht rrezikut për të zemëruar Presidentin Donald Trump. Ky i fundit i ka kritikuar tashmë rregulloret dixhitale të bllokut evropian dhe ka premtuar masa hakmarrëse nëse kompanitë amerikane të teknologjisë ndëshkohen.

BE-ja i cilëson shtatë gjigantët botërorë të teknologjisë — Amazon, Apple, Alphabet, kompania mëmë e Google, Meta, Microsoft dhe pronari i TikTok, ByteDance — si “rojtarë” që kontrollojnë aksesin e konsumatorëve.

“Në BE, kompanitë kanë të drejtë të konkurrojnë në mënyrë të drejtë. Kontrolluesit e portës kanë detyrimin të sigurojnë kushte dhe të drejta të barabarta për konsumatorët për të zgjedhur oferta alternative më të lira”, deklaroi zëdhënësi i Komisionit Evropian, Thomas Regnier.

Google kishte humbur së fundmi edhe apelin kundër një gjobe prej 4.5 miliardë dollarësh. Masa ishte vendosur për shkeljen e rregullave antitrust të BE-së, pasi dominimi i sistemit operativ celular Android ishte përdorur për të penguar konkurrencën dhe për të kufizuar mundësitë e zgjedhjes së konsumatorëve.