Teknologjia digjitale mund të transformojë motorët e automjeteve elektrike

Industria e automjeteve po përpiqet prej kohësh të reduktojë varësinë nga metalet e rralla dhe me kosto të lartë. Tesla bëri të ditur në vitin 2023 se synon t’i heqë këto lëndë të para nga gjenerata e ardhshme e motorëve të saj, ndërsa General Motors (GM) dhe Stellantis po financojnë zhvillimin e magnetëve alternativë të bazuar në nitride.

Një zgjidhje tjetër po zhvillohet nga kompania indiane Vimag Labs, e cila synon që magnetët fizikë t’i zëvendësojë me një sistem digjital. Përmes kontrollit shumë të saktë të elektronikës nga softueri, fusha magnetike krijohet në çast dhe në vendin ku kërkohet. Portali Elektrec raporton se risia nuk lidhet me përdorimin e ndonjë materiali të ri, por me një teknologji inteligjente kontrolli.

Motorët elektrikë të zakonshëm mbështeten te magnetë të fuqishëm dhe të integruar në mënyrë të përhershme, për prodhimin e të cilëve nevojiten metale të kushtueshme dhe të rralla.

Sipas themeluesit dhe drejtorit ekzekutiv të Vimag Labs, Manish Seth, zhvillimi i teknologjisë ka kërkuar më shumë se 87.600 orë punë inxhinierike. Kompania ka marrë ndërkohë një patentë dhe ka siguruar financim prej rreth 4.4 milionë eurosh. Provat e para kanë filluar tashmë në bashkëpunim me prodhues të motoçikletave dhe automjeteve.

Megjithatë, kritikët ngrenë një shqetësim bazë: krahasuar me motorët tradicionalë, modelet pa magnetë zakonisht harxhojnë ndjeshëm më shumë energji. Ende nuk dihet nëse teknologjia e Vimag Labs do të arrijë të bëjë përjashtim nga ky rregull.

BMW, nga ana tjetër, përdor prej vitesh motorë që nuk kanë magnetë permanentë. Forca magnetike e nevojshme prodhohet artificialisht përmes mbështjelljeve elektrike të vendosura brenda motorit.

Kjo zgjidhje ka edhe mangësi, pasi mbështjelljet shtesë prej bakri rrisin peshën e motorit. Gjithashtu, administrimi i rrjedhës së rrymës kërkon një njësi të posaçme kontrolli.