Shefi i Renaultit kritikon Brukselin: Rregullat e BE-së po rrisin çmimet e veturave

François Provost, drejtor ekzekutiv i grupit Renault, ka ngritur alarmin se numri i madh i rregulloreve të Bashkimit Evropian po shton vazhdimisht shpenzimet për prodhimin e automjeteve, kosto që në fund reflektohen drejtpërdrejt në çmimet për konsumatorët.

Ai vlerëson se prodhuesit evropianë të automobilave janë vënë nën presion të konsiderueshëm nga standardet e emetimeve, kriteret e reja teknike dhe detyrimet e tjera rregullatore. Përmbushja e këtyre kërkesave e shtrenjton procesin e prodhimit dhe kufizon mundësinë për të nxjerrë në treg makina me çmime të përballueshme.

Provost i ka bërë thirrje Brukselit që të ndjekë një politikë më pragmatike dhe t’u krijojë kompanive më shumë hapësirë për zhvillimin e teknologjive të reja dhe reduktimin e kostove. Mes propozimeve të tij është edhe pezullimi i përkohshëm i disa rregullave, në mënyrë që industria të ketë kohë të përshtatet me zhvillimet në treg.

“Problemi sot është se ne nuk po merremi vetëm me uljen e kostove, por po shpenzojmë shumë energji duke ndjekur rregullat”, është shprehur drejtori i Renaultit. Sipas tij, kalimi te automjetet elektrike duhet të realizohet në mënyrë të qëndrueshme, pa ua shtuar barrën financiare blerësve përmes çmimeve më të larta.

Drejtues të industrisë thonë gjithashtu se kërkesat evropiane kanë kontribuar në largimin gradual nga tregu të makinave të vogla dhe më ekonomike. Automjetet e destinuara për përdorim urban, sipas tyre, janë shtrenjtuar si pasojë e pajisjeve të detyrueshme të sigurisë, zbatimit të teknologjive të reja dhe standardeve për pakësimin e emetimeve.

Nga ana tjetër, Bashkimi Evropian mbron qëndrimin se masat e reja janë hartuar për të zvogëluar ndotjen dhe për të përmirësuar sigurinë rrugore. Duke nisur nga korriku 2026, të gjitha automjetet e reja në BE do të duhet të plotësojnë kushte shtesë për sistemet e sigurisë, ku përfshihen frenimi automatik emergjent dhe teknologji të tjera që ndihmojnë drejtuesit e mjeteve.

Në këtë periudhë, sektori evropian i automobilave po kalon një transformim të thellë, i nxitur nga orientimi drejt makinave elektrike, rivaliteti me prodhuesit kinezë dhe nevoja për t’i mbajtur çmimet brenda mundësive të konsumatorëve.