Për një Ferrari të ri, pritja zgjatet të paktën deri në vitin 2028

Kush synon të blejë një Ferrari të ri duhet të bëhet gati për një pritje të gjatë. Prodhuesi italian i makinave luksoze ka grumbulluar një numër të madh porosish, ndaj dorëzimi i disa modeleve të reja mund të vonojë deri në vitin 2028.

Interesi për automjetet e markës ka qenë më i lartë sesa kishte parashikuar kompania. Ferrari, me seli në Maranello, ka bërë të ditur se kapacitetet e porosive janë rezervuar për një periudhë të gjatë, çka do të thotë se klientëve të rinj mund t’u duhen disa vite për ta marrë makinën.

Modelet e prezantuara së fundmi kanë ndikuar veçanërisht në rritjen e kërkesës. Mes tyre është Ferrari 12Cilindri, pasuesi i 812 Superfast, së bashku me modele të tjera ekskluzive që prodhohen në sasi të kufizuara.

Kompania italiane vijon t’i përmbahet politikës së kufizimit të prodhimit, me synimin për të mbrojtur ekskluzivitetin e markës. Sipas kësaj strategjie, numri më i ulët i automjeteve ndihmon që secili model të ruajë vlerën dhe kërkesën e lartë.

Për shumë blerës të pasur, problemi kryesor nuk është kostoja e lartë, por koha që duhet të kalojë deri në dorëzim. Në raste të caktuara, klientëve u duhet të presin disa vite përpara se të marrin veturën që kanë porositur.

Radha e gjatë e porosive dëshmon se interesi për markat më prestigjioze të makinave sportive vazhdon të jetë jashtëzakonisht i madh, pavarësisht transformimeve në industrinë e automobilave, kalimit drejt modeleve elektrike dhe shtimit të kostove të prodhimit.