Volkswagen ID.3 GTI hyn në histori si modeli GTI më i fuqishëm i markës

Volkswagen ka zbuluar ID.3 GTI, variantin elektrik sportiv të hatchback-ut kompakt, i cili tashmë mban rekordin si GTI-ja më e fuqishme e prodhuar ndonjëherë nga kompania gjermane. Ky model zë vendin e ID.3 GTX dhe sjell një risi historike për markën: për herë të parë, logoja GTI shoqëron një Volkswagen me tërheqje në rrotat e pasme.

Ndryshimi i emërtimit vjen pak më shumë se dy vjet pas hyrjes së Volkswagen-it në tregun e automjeteve elektrike sportive me ID.3 GTX. Pas përditësimit të ID.3, versioni sportiv i modelit do të prezantohet tashmë si ID.3 GTI.

Megjithatë, ky nuk është automjeti i parë elektrik i Volkswagen-it që përdor emrin GTI. Ky titull i përket ID. Polo GTI, një model më i vogël që ka konfigurim me tërheqje të përparme.

Fuqia e ID.3 GTI arrin në 322 kuaj fuqi, shifër e njëjtë me atë të ID.3 GTX që zëvendëson. Kjo e vendos atë në krye të historisë së modeleve GTI të Volkswagen-it, duke kaluar me një kuaj fuqi edhe Golf GTI Edition 50.

Çifti rrotullues maksimal mbetet 545 Nm, ndërsa të dhënat e përshpejtimit janë të pandryshuara. Sipas prodhuesit, makina përshkon sprintin nga 0 në 100 km/h për 5.6 sekonda dhe arrin një shpejtësi maksimale prej 200 km/h, e kufizuar elektronikisht.

Një nga tiparet kryesore të ID.3 GTI lidhet me arkitekturën e tij. Modeli përdor platformën MEB+ dhe një motor elektrik të vendosur në pjesën e pasme, duke u bërë GTI-ja e parë në historinë e Volkswagen-it me tërheqje të pasme.

Në anën tjetër, ID. Polo GTI bazohet në një konfigurim me tërheqje të përparme, më të zakonshëm për automjetet GTI, edhe pse fuqizohet nga një motor elektrik dhe jo nga një motor me djegie të brendshme.

Energjia sigurohet nga një bateri litium-jon me kapacitet neto 79 kWh, transmeton Telegrafi.

Volkswagen deklaron se ID.3 GTI mund të përshkojë deri në 601 kilometra sipas ciklit WLTP. Kjo shifër është rreth 10 kilometra më e lartë se autonomia e ID.3 GTX.

Kur përdoret karikimi i shpejtë me rrymë të vazhduar, bateria pranon fuqi deri në 183 kW. Karikimi nga 10 në 80 për qind zgjat afërsisht 29 minuta.

Për sa i përket pamjes, ID.3 GTI përfshin përditësimet e aplikuara nga Volkswagen në modelin standard, i cili do të mbajë emrin ID.3 Neo.

Fasada e përparme është ridizajnuar me një karakter më agresiv. Ajo përmban shenjat dalluese të kuqe të GTI-së, sipërfaqe të zeza me shkëlqim dhe drita vertikale LED për drejtimin gjatë ditës.

Në dyert e përparme, logoja GTI ka zëvendësuar emblemën GTX. Automjeti vjen me disqe të rinj 20-inç dhe goma 225 si pajisje fillestare, ndërsa blerësit mund të zgjedhin si alternativë goma më të gjera 235.

Edhe pjesa e pasme është përshtatur për ta theksuar karakterin sportiv. Emblema GTI ndodhet në kapakun e bagazhit, i cili tani ka të njëjtën ngjyrë me karrocerinë, ndërsa edhe çatia është në të njëjtin ton me trupin. Detajet e zeza me shkëlqim e bëjnë më të dallueshëm këtë version në gamën e ID.3.

Ndërhyrjet nuk janë kufizuar vetëm te dizajni i jashtëm. Në kabinë, Volkswagen ka shtuar më shumë komanda fizike se në modelin GTX, përfshirë butona të dedikuar në timon, një rrotë fizike për rregullimin e volumit dhe butona të veçantë për xhamat e pasmë.

Instrumentari i shoferit është zëvendësuar me një ekran digjital 10.25-inç, ndërsa funksionet multimediale shfaqen në një ekran 12.9-inç.

Prodhuesi ka hequr gjithashtu rrëshqitësin me prekje, i cili kishte marrë kritika në modelet e mëparshme. Në vend të tij është vendosur një rresht me komanda konvencionale në konsolën qendrore.

Brenda kabinës ndodhen edhe sedilje sportive me mbështetje më të mirë të trupit, si dhe elemente të kuqe të shpërndara në pjesë të ndryshme të interierit, në përputhje me traditën e modeleve GTI.

ID.3 GTI pajiset me një GTI Mode, i cili rregullon sistemet e automjetit për të ofruar performancën maksimale dhe aktivizon Launch Control.

Në këtë regjim ndodh edhe diçka më e veçantë: sistemi lëshon një tingull artificial motori, të krijuar për të sjellë një përvojë akustike të ngjashme me atë të një Golf GTI me motor tradicional.

Volkswagen synon ta vazhdojë prodhimin dhe shitjen e Golf GTI-së edhe për shumë vite, ndërsa ID.3 GTI shihet si një tjetër hap drejt elektrifikimit të modeleve sportive të markës.

Pas prezantimit zyrtar, ID.3 GTI pritet të mbërrijë në tregun evropian në pranverën e vitit 2027.

Me 322 kuaj fuqi, 545 Nm, një autonomi të parashikuar prej 601 kilometrash dhe tërheqje në rrotat e pasme, Volkswagen ID.3 GTI hap një etapë të re për emrin GTI, duke e çuar atë nga motorët me djegie të brendshme drejt një platforme plotësisht elektrike. /Telegrafi/