Familja ngre padi ndaj Tesla-s pas vdekjes së një gruaje në aksident me Autopilot në Teksas

Familjarët e një gruaje 76-vjeçare nga Teksasi kanë çuar në gjykatë Tesla-n, pasi ajo humbi jetën kur një Model 3 u përplas me shtëpinë e saj, ndërsa sipas drejtuesit, ishte aktivizuar sistemi Autopilot.

Sipas padisë, kompania nuk u ka dhënë drejtuesve paralajmërimet e duhura për rreziqet dhe kufizimet që lidhen me Autopilot dhe Full Self-Driving (FSD).

Dokumentet gjyqësore tregojnë se automjeti kaloi me shpejtësi përmes oborrit të banesës në Katy, pranë Houstonit, goditi murin e përparmë dhe i shkaktoi plagë fatale Martha Avila-s.

Tesla mban qëndrimin se sistemi nuk ishte në kontroll të plotë në çastin e aksidentit, duke theksuar se shoferi e kishte shtypur pedalin e gazit deri në fund dhe kështu kishte tejkaluar funksionimin e vetëdrejtimit.

Padia kërkon më shumë se 1 milion dollarë dëmshpërblim, si edhe kompensime ndëshkuese të tjera, ndërsa autoritetet federale amerikane po vijojnë hetimin për ngjarjen.

Që prej vitit 2016, administrata amerikane e sigurisë rrugore ka hapur afro 50 hetime të veçanta për aksidente të Tesla-s që dyshohet se kanë përfshirë sistemet e avancuara të asistencës së shoferit. /Telegrafi/