Vozinha u shndërrua në fenomen global: nga 50,000 ndjekës, tani pranë Manuel Neuerit

Kupa e Botës 2026 po tregon sërish se brenda një kohe shumë të shkurtër mund të nxjerrë në skenë emra të rinj globalë dhe t’ua ndryshojë krejtësisht jetën.

Rasti më i fundit, dhe ndoshta më i veçanti, është ai i portierit me përvojë të kombëtares së Kepit të Gjelbër, Vozinha, i cili është kthyer në një sensacion të vërtetë në mbarë botën.

Pas paraqitjes së tij të jashtëzakonshme ndaj Spanjës, ku realizoi pritje mbresëlënëse kundër një rivali shumë të fortë, llogaria e tij në rrjetet sociale njohu një rritje të papritur dhe të jashtëzakonshme.

Sipas faqes së njohur të futbollit Football Tweet, përpara nisjes së Kupës së Botës, Vozinha ishte thuajse i panjohur për publikun jashtë Afrikës dhe në Instagram numëronte vetëm 50,000 ndjekës.

Por efekti i Kupës së Botës u ndje menjëherë. Pas ndeshjes më të mirë të karrierës së tij kundër spanjollëve, numri i ndjekësve të portierit u ngjit në shifrën marramendëse prej 14 milionësh.

“Ndikimi i Kupës së Botës është absolutisht i pabesueshëm. Vozinha kishte 50,000 ndjekës para turneut dhe tani ai pothuajse e ka tejkaluar Manuel Neuer, një nga portierët më të mëdhenj të të gjitha kohërave”, thuhej në postimin që bëri xhiron e planetit.

Përmasat e këtij fenomeni kuptohen më qartë kur shihet krahasimi me emrat më të mëdhenj të futbollit.

Manuel Neuer, portieri legjendar i Gjermanisë dhe figurë ikonike e Bayernit, ka aktualisht 14.7 milionë ndjekës në Instagram.

Ndërkohë, Vozinha me 14 milionë ndjekës është shumë pranë tij dhe, nëse kombëtarja e tij vijon me paraqitje të mira, nuk përjashtohet që shumë shpejt portieri i Kepit të Gjelbër të ketë më shumë mbështetës në rrjetet sociale sesa një nga gardianët më të mëdhenj në histori.