UEFA kundërshton vendimin e FIFA-s për Balogun: Është kapërcyer një vijë e kuqe

UEFA ka dalë me një reagim të fortë ndaj vendimit të FIFA-s për të pezulluar zbatimin e dënimit me një ndeshje për Folarin Balogun, duke e konsideruar këtë hap një precedent të rrezikshëm që dëmton integritetin e futbollit.

Në deklaratën e saj zyrtare, institucioni i futbollit evropian nënvizon se pezullimi automatik pas një kartoni të kuq është një rregull i qartë, i cili nuk mund të interpretohet ndryshe apo të ndryshohet gjatë zhvillimit të një turneu.

“Vendimi i djeshëm për të pezulluar për një periudhë prove prej një viti zbatimin e pezullimit automatik me një ndeshje pas kartonit të kuq të dhënë për Folarin Balogun kaloi një vijë të kuqe”.

UEFA thekson se futbolli, njësoj si çdo sport tjetër, mbështetet te rregullat, të cilat garantojnë një konkurrim të drejtë, të ndershëm dhe transparent.

“Futbolli, si çdo sport tjetër, mbështetet te rregullat, të cilat janë baza e një gare të drejtë, të ndershme dhe transparente. Ndonjëherë rregullat janë të hapura për interpretim. Në këtë rast, jo”.

Sipas saj, pezullimi minimal automatik prej një ndeshjeje pas kartonit të kuq nuk është çështje diskrecioni dhe nuk ka nevojë për një vendim të një organi kompetent që të hyjë në fuqi.

“Pezullimi automatik minimal me një ndeshje pas një kartoni të kuq nuk është një opsion diskrecional dhe nuk kërkon vendimin e një organi kompetent për të hyrë në fuqi. Është një parim i përfshirë në rregullore, që nuk mund t’i nënshtrohet përjashtimeve, aq më pak në mes të një turneu ku disa lojtarë të tjerë kanë qenë në të njëjtën situatë dhe e kanë vuajtur rregullisht pezullimin”.

Organizmi evropian paralajmëron se ky vendim i FIFA-s cenon besueshmërinë e garës dhe hap rrugën për raste të ngjashme gjatë Kupës së Botës.

“Kur siguria e zbatimit të rregullave nuk garantohet më nga vetë kujdestarët e tyre, integriteti i lojës vihet në pikëpyetje dhe besueshmëria e një gare dëmtohet”.

Po sipas UEFA-s, kjo lëvizje krijon precedent brenda turneut në zhvillim, duke bërë që rastet e ngjashme të kërkojnë tashmë trajtim të barabartë, në dëm të vetë garës.

“Po ashtu, ky vendim krijon një precedent në turneun aktual, ku situata të ngjashme tani do të kërkojnë trajtim të barabartë, në dëm të vetë garës”.

Në mbyllje të deklaratës, UEFA shprehu habinë për mënyrën se si është administruar ky rast.

“Futbolli është sporti më i dashur në botë sepse është një lojë e bukur dhe gëzon besimin e njerëzve sepse luhet kudo sipas të njëjtave rregulla”.

“Ne shprehim mosbesimin tonë për një vendim kaq të paprecedentë, të pakuptueshëm dhe të pajustifikueshëm”, thuhet në komunikatë./