Trump mund të dalë jashtë protokollit të FIFA-s në finalen e Kupës së Botës

Donald Trump, 80 vjeç, pritet të ketë një rol të pazakontë në ceremoninë përmbyllëse të Kupës së Botës, pasi do të lejohet t’ia dorëzojë vetë trofeun skuadrës fituese dhe të qëndrojë me lojtarët në podium gjatë festës, në kundërshtim me praktikën e zakonshme të FIFA-s.

Sipas “talkSPORT”, presidenti amerikan është informuar se FIFA dëshiron që ai t’ua japë kupën kampionëve të rinj. Në ceremoninë e mbylljes së turneut do të ftohen edhe përfaqësues zyrtarë nga Meksika dhe Kanadaja.

Rregullorja standarde e FIFA-s parashikon që trofeu të vendoset fillimisht në një piedestal dhe më pas të çohet në podium nga një pjesëtar i ekipit fitues. Megjithatë, burime të “talkSPORT” pranë kësaj çështjeje bëjnë të ditur se FIFA do t’i lërë Trumpit mundësinë të vendosë vetë nëse do të qëndrojë pranë skuadrës gjatë ceremonisë së trofeut apo nëse do t’u bashkohet zyrtarëve të tjerë në skenë.

Burime të “talkSPORT” nga Shtëpia e Bardhë mendojnë se Trump do të zgjedhë sërish të festojë me ekipin triumfues, duke qenë pranë futbollistëve në çastin kur trofeu ngrihet lart.

Trump kishte marrë vëmendje edhe më parë gjatë Kupës së Botës për Klube, kur qëndroi në krah të kapitenit të Chelseat, Reece James, në momentin kur ky i fundit ngriti trofeun. Në atë skenë, Cole Palmer u pa dukshëm i hutuar teksa ndodhej menjëherë pas presidentit amerikan. Fillimisht, presidenti i FIFA-s, Gianni Infantino, u përpoq ta largonte Trumpin nga skena, por më pas i kërkoi të qëndronte gjatë ceremonisë.

Për shkak të angazhimeve të tjera, Trump mungoi në ndeshjen hapëse që kombëtarja e SHBA-së e fitoi ndaj Paraguait me rezultatin 4-1, por ai ka konfirmuar praninë e tij në finalen e Kupës së Botës, e cila do të zhvillohet më 19 korrik në stadiumin “MetLife”.

Po ashtu, burime nga Shtëpia e Bardhë nuk e përjashtojnë mundësinë që presidenti amerikan të ndjekë edhe disa takime të tjera gjatë turneut, në varësi të agjendës së tij zyrtare.

Ndërkohë, organizimi i turneut është shoqëruar edhe me diskutime të tjera, ku përfshihen kritikat për çmimet e larta të biletave dhe produkteve në stadiume, si edhe debatet për numrin e madh të skuadrave pjesëmarrëse.