Trabzonspori synon ta ribashkojë Mo Salah me ish-shokun e tij te Liverpooli, përgatit ofertë të bujshme

Pasi konfirmoi transferimin e Mohamed Salah, Trabzonspori ka bërë jehonë në treg dhe tashmë po punon për një tjetër goditje të madhe.

Drejtuesit e klubit turk kanë hapur negociatat me Al Hilalin për sulmuesin uruguaian Darwin Nunez. Synimi është që ai të luajë sërish përkrah Salah, me të cilin ka qenë pjesë e së njëjtës skuadër te Liverpooli.

Nunez, 27 vjeç, kërkon kthimin në futbollin evropian, pasi nuk e ka më vendin në formacionin e ekipit saudit. Uruguaiani kishte pranuar më parë mundësinë e kalimit te Besiktasi, por transferimi nuk u finalizua dhe Trabzonspori përfitoi për t’u përfshirë në garë.

Një propozim zyrtar u është dërguar tashmë si Al Hilalit, ashtu edhe përfaqësuesve të futbollistit, ndërsa klubi turk po përpiqet të sigurojë pëlqimin e sulmuesit.

Al Hilali nuk e kundërshton largimin e Nunezit, por pranon vetëm një marrëveshje huazimi, duke qenë se për transferimin e tij kishte shpenzuar 53 milionë dollarë.

Për ta bindur 27-vjeçarin të transferohet në Turqi, Trabzonspori është gati t’i ofrojë një pagë prej 7 milionë eurosh në vit.

Nëse operacioni përmbyllet me sukses, Salah dhe Nunez do të luajnë sërish së bashku pas periudhës së përbashkët te Liverpooli, këtë herë në futbollin turk.