Mohamed Salah drejt Trabzonsporit, akord dyvjeçar me pagë rreth 17 milionë euro

Mohamed Salah ndodhet pranë kalimit te Trabzonspori, pasi klubi turk ka bërë përparim të konsiderueshëm në bisedimet me futbollistin egjiptian dhe përfaqësuesit e tij. Gazetari turk Yagiz Sabuncuoglu pretendon se marrëveshja tashmë është përfunduar.

Mediat turke raportojnë se drejtuesit e Trabzonsporit janë takuar me agjentin e Salahut dhe i kanë dorëzuar ofertën zyrtare yllit egjiptian.

Propozimi parashikon një marrëveshje me kohëzgjatje dyvjeçare, nga e cila Salah pritet të sigurojë një pagë prej afërsisht 17 milionë eurosh gjatë kësaj periudhe.

Sipas Sabuncuoglut, palët kanë gjetur gjuhën e përbashkët dhe para zyrtarizimit të transferimit duhet të zgjidhen vetëm hollësitë e fundit.

Raportimet bëjnë të ditur se Mohamed Salah pritet të mbërrijë në Stamboll të mërkurën, në orën 12:00, për të përmbushur procedurat përfundimtare të kalimit te Trabzonspori.

Në qendër të negociatave ishte edhe përfshirja e një klauzole të veçantë për të ardhurat nga produktet që mbajnë emrin e tij. Salah kërkoi të merrte një përqindje të shitjeve të produkteve të markës së tij dhe, sipas raportimeve, Trabzonspori e ka miratuar këtë kusht.

E njëjta çështje kishte bërë që më herët të dështonte transferimi i tij te Besiktasi, pavarësisht se pjesa më e madhe e kushteve ishte dakorduar.

Në rast se marrëveshja merr formë përfundimtare, Trabzonspori do të jetë skuadra e shtatë e karrierës së Salahut. Para këtij transferimi, ai ka qenë pjesë e Arab Contractors, Basel, Fiorentina, Roma, Chelsea dhe Liverpool.