Tottenhami shpenzoi 355 milionë euro, por pas tri ndeshjesh ende është pa gol dhe me vetëm një pikë

Tottenham vazhdon të zhgënjejë në Ligën Premier, pasi barazoi 0-0 në transfertë kundër Nottingham Forestit, në ndeshjen e vlefshme për xhiron e tretë. Pas 270 minutash lojë në kampionat, skuadra e Roberto De Zerbit ende nuk e ka gjetur rrugën drejt golit.

Sezoni për Spurs nisi me humbjen 3-0 ndaj Brentfordit, ndërsa në javën e dytë londinezët u mposhtën 2-0 nga Newcastle në stadiumin e tyre. As sfida në City Ground nuk solli kthesën e pritur, pasi Tottenham u largua vetëm me një pikë dhe pa shënuar.

Pas tri javësh, Tottenham ka grumbulluar vetëm një pikë dhe regjistron golaverazhin 0:5. Kështu, skuadra jo vetëm që mbetet pa fitore, por ende nuk ka realizuar asnjë gol në Ligën Premier.

Paraqitja e dobët në kampionat bie veçanërisht në sy për shkak të investimeve të mëdha të bëra gjatë afatit kalimtar të verës. Klubi londinez shpenzoi 354.7 milionë euro për transferime, duke ndërmarrë një riorganizim të gjerë të ekipit.

Sandro Tonali iu bashkua Tottenhamit nga Newcastle për 108 milionë euro, Mateus Fernandes u ble nga West Ham për 99 milionë euro, Sávio erdhi nga Manchester City për 87.7 milionë euro, ndërsa Jan Paul van Hecke u transferua nga Brighton për 60 milionë euro.

Në skuadër u afruan gjithashtu Andy Robertson, Marcos Senesi dhe Martin Dúbravka, të cilët firmosën si lojtarë të lirë. Megjithatë, këto shpenzime nuk kanë dhënë deri tani asnjë efekt në rezultatet e Tottenhamit në kampionat.

Ndryshe nga paraqitjet në Ligën Premier, Spurs fituan 5-1 ndaj Charltonit në Kupën e Ligës. Në kampionat, megjithatë, tabloja mbetet shqetësuese: tri ndeshje, asnjë gol dhe vetëm një pikë.

Ekipi i De Zerbit po has vështirësi të mëdha në repartin ofensiv dhe deri tani ka krijuar shumë pak rrezik për portat kundërshtare. Pavarësisht përforcimeve dhe investimit prej afro 355 milionë eurosh, Tottenham vazhdon të jetë pa fitore dhe pa gol në Ligën Premier.

Gjatë verës, klubi shiti edhe mbrojtësin kroat 19-vjeçar Luka Vuskovic te Brighton, pas paraqitjeve të mira gjatë huazimit te HSV. Sot, Vuskovic realizoi golin e tij të parë në Ligën Premier, duke shënuar me kokë në barazimin 1-1 të Brightonit ndaj Leedsit./