Show i Suedisë, 5 gola Tunizisë! Bregu i Fildishtë shtang Ekuadorin në minutën e 90-të

Fitore spektakolare e skuadrës së Potter në Grupin F. Në Grupin E, “Elefantët” realizojnë golin 3-pikësh në minutën e frymën e fundit.

Nata e fundit e Botërorit 2026 i dhuron kopertinën Suedisë së trajnerit Graham Potter, që jep një sinjal të qartë, duke mundur Tunizinë 5-1 në Monterrey. Pas mungesës në Katar në 2022-shin, suedezët rikthehen në skenën botërore nga dera kryesore. Në stadiumin BBVA të Monterrey, ata luajtën një futboll ofensiv dhe tashmë komandojnë të vetëm Grupin F.

Sfilata skandinave filloi që në minutën e 7-të, me golin e Yasin Ayari. Lojtari i Brighton përfitoi nga një gabim i mbrojtjes kundërshtare dhe realizoi me të djathtën. Për respekt të origjinës tuniziane, ai nuk festoi. Suedia dyfishoi me një kundërsulm rrufe të finalizuar nga Alexander Isak.

Tunizia nxjerr në pah krenarinë dhe shkurton diferencën në minutën e 43-të me Omar Rekik, pas një krosi të Hannibal Mejbri. Suedia dikton edhe pjesën e dytë. Skhiri humb një top nga presioni i Isak dhe Gyokeres nuk gabon para portës. Në minutën e 84-t Mattias Svanberg shënon dhe golin e 4-t, ndërsa në shtesë Ayari kompleton mbrëmjen e ëndërruar me një tjetër goditje nga distanca dhe 5-1.

Ndeshja tjetër dhuroi një fund thriller në Filadelfia. Bregu i Fildishtë, i rikthyer në Botëror pas 12 vitesh, mundi Ekuadorin 1-0 dhe u barazua me pikë me Gjermaninë në kreun e Grupit E. Amerikanojugorët ishin pa fat, pasi në pjesën e parë goditën dy herë traversën me John Yeboah dhe Alan Minda.

Në pjesën e dytë “Elefantët” e rritën lojën, goditën traversën edhe ata me Elye Wahi. Kur dukej se gjithçka do të mbyllej në barazim, në minutën e 90-të Singo dha një asist për Amad Diallo dhe talenti i Manchester United shënoi golin me vlerën e 3 pikëve. Ekuadori vinte nga një seri prej 19 ndeshjesh pa humbje.