Rodri vendos për të ardhmen: Real Madridi favorit ndaj Barcelonës

Rodri duket se e ka përcaktuar klubin ku dëshiron të vazhdojë karrierën. Sipas Diario AS, mesfushori i Manchester Cityt synon transferimin te Real Madridi, pavarësisht interesimit të shfaqur nga Barcelona.

Barcelona ka nisur lëvizjet e para në prapaskenë, duke komunikuar me përfaqësuesit e kampionit të botës për të kuptuar nëse një marrëveshje e mundshme mund të realizohet.

Megjithatë, klubi katalanas nuk ka bërë ende një ofertë zyrtare. Gjendja financiare e Barcelonës mbetet pengesa kryesore për të përfunduar një operacion të përmasave të tilla.

Real Madridi, ndërkohë, konsiderohet zgjedhja e preferuar e Rodrit. Raportimet bëjnë të ditur se drejtuesit e “Los Blancos” kanë gjetur tashmë gjuhën e përbashkët me lojtarin për kushtet personale, duke e vendosur klubin madrilen në avantazh për transferimin.

Te Manchester City, Rodri ka qenë një prej figurave kryesore të formacionit të Pep Guardiolës dhe vlerësohet si një nga mesfushorët më të kompletuar në botë. Ai ka luajtur rol të rëndësishëm në arritjet e klubit anglez, mes tyre triumfi në Ligën e Kampionëve dhe disa tituj të Ligës Premier.

Megjithatë, bindja e Manchester Cityt për ta lënë të largohet nuk pritet të jetë e lehtë. Kampionët anglezë nuk duan të humbasin një prej liderëve të ekipit dhe për 30-vjeçarin kanë caktuar një çmim rreth 75 milionë euro.

Real Madridi synon ta sigurojë shërbimin e tij për afërsisht 60 milionë euro. Për këtë arsye, klubi spanjoll pritet të nisë negociatat me Manchester Cityn, me synimin për të arritur një marrëveshje të ndërmjetme.