PSG-ja pengon përpjekjet e tre klubeve angleze për transferimin e Désiré Doué

Arsenali, Chelsea dhe Manchester City janë përballur me një pengesë në objektivin e tyre për të afruar Désiré Doué, pasi Paris Saint-Germain ka avancuar në bisedimet për zgjatjen e kontratës së sulmuesit francez, raporton TEAMtalk.

Edhe pse marrëveshja aktuale e 20-vjeçarit me kampionët e Francës skadon në vitin 2029, drejtuesit e klubit parisien po përpiqen ta zgjasin atë më tej, me synimin për ta mbajtur lojtarin në skuadër për një periudhë sa më të gjatë.

Palët ende nuk kanë gjetur një marrëveshje përfundimtare, por negociatat kanë shënuar përparim.

Tre klubet nga Liga Premier e kanë monitoruar me vëmendje situatën e Doué, duke shpresuar se do të krijohej mundësia për ta transferuar në Angli.

Megjithatë, raportimet bëjnë të ditur se të gjitha ato janë informuar për qëndrimin e francezit, i cili nuk planifikon të largohet nga PSG-ja.

Edhe Bayern Munichu është në garë për futbollistin, pasi klubi gjerman vazhdon të ketë interes për të, pas përpjekjes së pasuksesshme për ta blerë në vitin 2024.

Nën drejtimin e trajnerit Luis Enrique, Doué ka fituar një rol të rëndësishëm në repartin ofensiv të PSG-së.

Pesha e tij në formacionin parisien e ka bindur klubin të punojë për t’i garantuar një të ardhme afatgjatë, duke e bërë edhe më të vështirë ndërhyrjen e skuadrave që kërkojnë ta transferojnë.