Probleme për Shqipërinë para sfidës ndaj Serbisë, zbulimi i fundit i Silvinjos la fushën me dëmtime fizike

Pak ditë para publikimit të listës së futbollistëve për ndeshjen e rëndësishme ndaj Serbisë në kualifikueset e Botërorit, trajneri i Kombëtares, Silvinjo, ka pse të shqetësohet.

Nga një anë disa lojtarë po shkëlqejnë me paraqitjet e tyre para portës. Por nga ana tjetër, dëmtimet e zakonshme nuk po u ndahen kuqezinjve.

Një nga emrat e fundit në listë me probleme fizike, është ai i një prej “zbulimeve” të trajnerit të kuqezinjve, mesfushori Julian Shehu.

Mesfushori është kthyer në një kohë të shkurtër në një pikë fikse, në rreshtimin e kuqezinjve dhe padyshim kontributi i tij do të ishte i domosdoshëm ndaj Serbisë.

Por në ndeshjen e të dielës në kampionatin polak, ndaj Rakov, mesfushori shqiptar nuk u kthye në fushë pas pushimit të ndeshjes.

Vetë klubi, në komentin në faqen e internetit të tij pas sfidës, thekson se Shehu nuk mund të vazhdonte më për shkak të problemeve fizike, duke detyruar trajnerin të bënte një zëvendësim.

Një situatë që padyshim bëhet shqetësuese, duke parë edhe dëmtimet e emrave si Ismajli, Kumbulla apo Hoxha para kësaj ndeshje shumë të rëndësishme për fatin e kuqezinjve në rrugëtimin e Botërorit.