Prishtina kryeson pas katër fitoreve, Albin Krasniqi zbulon synimet për sezonin

Sezoni i ri në Superligën e Kosovës ka nisur në mënyrë ideale për Prishtinën. Skuadra kryeqytetase ka regjistruar katër fitore në po aq ndeshje dhe mban vendin e parë në tabelë, rezultate që kanë rikthyer entuziazmin në klubin që synon të ngjitet sërish në majat e futbollit kosovar.

Një rol të rëndësishëm në këtë ecuri ka pasur Albin Krasniqi, i cili e ka gjetur katër herë rrugën e rrjetës deri më tani.

Në intervistën e dhënë për Telegrafin, Krasniqi foli për rezultatet e fillimit të sezonit, paraqitjet e tij, punën e trajnerit Orges Shehi, rivalët në luftën për titull, objektivat e Prishtinës dhe përkrahjen e fuqishme të “Plisave”.

Futbollisti u shpreh i lumtur për ndihmën që po i jep skuadrës, megjithëse nënvizoi se forma e mirë kolektive e kënaq edhe më shumë.

“Sigurisht që ndihem i kënaqur që po kontribuoj për ekipin, por kënaqësinë më të madhe ma jep forma që po kalon e gjithë skuadra. Shpresoj fort që ta ruajmë këtë ritëm”, deklaroi Krasniqi për Telegrafin.

Edhe pse Prishtina e ka nisur kampionatin pa gabime, sulmuesi nuk preferon të flasë që tani për titullin. Sipas tij, vëmendja duhet të mbetet vetëm te sfida e ardhshme.

“E kemi filluar shumë mirë kampionatin, por për momentin mendojmë vetëm për ndeshjen pasuese. Përllogaritjet do t’i bëjmë kur të përfundojë sezoni dhe shpresojmë që gjithçka të ecë siç duhet deri atëherë”, tha ai.

Krasniqi vlerësoi lart kontributin e trajnerit Orges Shehi në këtë nisje pozitive, duke veçuar njëkohësisht klimën e mirë që është krijuar brenda ekipit.

“Një pjesë e madhe e meritave i takon trajnerit. Në klub mbizotëron një atmosferë shumë e mirë dhe secili prej nesh ka uri për sukses. Përpiqemi t’i realizojmë me saktësi kërkesat e trajnerit dhe ta mbajmë vazhdimësinë e paraqitjeve pozitive”, u shpreh Krasniqi.

Sa u përket synimeve individuale, ai dëshiron të vijojë kontributin me paraqitje të mira dhe shfaqi besim të madh në cilësitë e grupit.

“Gjatë këtij sezoni synoj ta ndihmoj skuadrën përmes paraqitjeve pozitive. Kam shumë besim te ky grup, sepse brenda tij ka cilësi të madhe. Uroj që gjatë kampionatit të mos përballemi me lëndime”, deklaroi ai.

Duke folur për betejën e titullit, Krasniqi parashikoi një garë të fortë dhe përmendi disa prej skuadrave që i konsideron konkurrentet kryesore të Prishtinës.

“Ky është një kampionat shumë i fortë. Dritën, Ballkanin, Malishevën dhe Gjilanin i konsideroj rivalë, por përqendrimi ynë është më shumë te vetja sesa te skuadrat e tjera”, theksoi futbollisti.

Në përfundim, Krasniqi iu drejtua me një mesazh të posaçëm “Plisave”, të cilët edhe gjatë këtij sezoni po qëndrojnë fuqishëm pranë Prishtinës.

“Në çdo takim, Plisat përbëjnë forcën tonë. Pavarësisht vendit ku zhvillohet ndeshja, ata gjenden gjithmonë pranë nesh.”

“Ajo që dua t’u them Plisave është të mos e humbin besimin te ky grup. Me ndihmën e Zotit, shpresoj që në përfundim të kampionatit t’i festojmë së bashku sukseset e Prishtinës”, përfundoi Krasniqi.