Prapaskenat e tentativës për transferim: Drejtori i Atletico Madridit negocioi fshehurazi për Alvarezin te Barcelona

Sipas raportimit të El Confidencial, Carlos Bucero, drejtori i përgjithshëm i futbollit te Atletico Madridi, ka bërë përpjekje gjatë verës për të ndihmuar kalimin e Julian Alvarezit te Barcelona. Për këtë çështje, ai kishte zhvilluar bisedime jozyrtare me drejtorin sportiv të klubit katalanas, Deco.

Bucero veproi në mënyrë të pavarur nga drejtuesit e tjerë të klubit, një qëndrim që shkaktoi pakënaqësi në radhët e Atletico Madridit. Në fund, drejtuesit e klubit madrilen vendosën ta pengonin largimin e Alvarezit.

Iniciativa e tij solli gjithashtu përplasje të forta brenda bordit të Atletico Madridit.

Marrëdhëniet mes Buceros dhe drejtuesit tjetër, Mateu Alemany, përshkruhen si të tensionuara. Në këtë situatë, Bucero kishte shqyrtuar shitjen e Alvarezit me synimin për të rikthyer ndikimin e vet në klubin madrilen.

Ai kishte marrë rolin e ndërmjetësit mes Atletico Madridit dhe Barcelonës, duke synuar të ndihmonte arritjen e një marrëveshjeje për Alvarezin. Megjithatë, “Los Rojiblancos” nuk ndryshuan qëndrim dhe gjatë gjithë kohës insistuan për ta mbajtur sulmuesin argjentinas.

26-vjeçari është rikthyer në skuadër pas sagës së gjatë të afatit kalimtar të verës dhe tani po punon për të përmirësuar raportin me tifozët.

Barcelona, ndërkohë, vazhdon të shpresojë për transferimin e tij. Raportohet se klubi katalanas po përgatit përpjekje të reja për Alvarezin në afatet e ardhshme kalimtare.