Atletico ngre tonet ndaj Barcelonës: Alvarez nuk largohet, Gil paralajmëron padi në FIFA

Drejtori i Atletico Madridit, Miguel Angel Gil, ka reaguar ashpër ndaj Barcelonës për interesimin e saj për Julian Alvarez, duke paralajmëruar se klubi madrilen mund ta çojë çështjen deri në FIFA me një ankesë zyrtare.

Ky reagim vjen pasi sulmuesi argjentinas bëri të ditur se dëshiron të largohet nga Atletico këtë verë, ndërsa sipas raportimeve, Barcelona mbetet opsioni i tij i preferuar.

“Barcelona nuk na respekton dhe beson se mund të na nënvlerësojë. Ndjej një trishtim të madh për deklaratat e Julian Alvarez”.

Gil theksoi gjithashtu se koha kur lojtari zgjodhi të fliste ishte e papërshtatshme, duke nënvizuar se ajo ditë i përkiste triumfit të Argjentinës dhe Lionel Messit.

“Nuk ishte dita e duhur për të bërë ato deklarata. Ishte dita e Messit dhe e kombëtares argjentinase, jo vetëm e Julianit. Vitin e kaluar, Barcelona bëri diçka shumë të ngjashme me Nico Williams dhe Athletic Bilbaon”.

Sipas drejtuesit të klubit, Alvarez ka ambiciet e tij, por edhe Atletico ka objektivat e veta dhe qëndrimi i klubit për këtë çështje i është bërë i qartë lojtarit.

“Julian ka një ëndërr dhe edhe ne te Atletico kemi ëndrrat tona. Është e vërtetë që ai foli me ne, por është po aq e vërtetë që ai e njeh shumë mirë qëndrimin tonë, sepse kemi qenë shumë të qartë: Atletico nuk dëshiron ta shesë”.

“Ai është një lojtar i madh dhe ne jemi shumë krenarë që e kemi në skuadrën tonë”.

Në përfundim, Gil konfirmoi se Atletico do të ndërmarrë veprime zyrtare ndaj Barcelonës për këtë rast.

“Përgjegjësia jonë është të mbrojmë interesat e Atleticos dhe për këtë arsye do të paraqesim një ankesë në FIFA kundër Barcelonës për negociata me një lojtar që ka kontratë aktive gjatë periudhës së mbrojtur”, përfundoi Gil.

Ndërkohë, Atletico ka refuzuar 100 milionë euro nga Barcelona, si edhe 150 milionë euro nga Real Madridi për yllin argjentinas./