Pesë lojtarët e pazëvendësueshëm të Mourinhos te Real Madridi

Projekti i ri i Jose Mourinhos në kryeqytetin spanjoll ka nisur të marrë trajtë dhe pesë futbollistë të ekipit të parë po shfaqen si baza kryesore e Real Madridit. Ata kanë luajtur si titullarë në çdo ndeshje të zhvilluar deri tani në La Liga.

Edhe pse është ende herët për vlerësime përfundimtare, tashmë mund të identifikohen lojtarët që po mbajnë barrën më të madhe të skuadrës. Kjo situatë pritet të vazhdojë të paktën derisa përforcimet e reja të integrohen plotësisht në ekip.

Marca raporton se pesë lojtarë të Real Madridit e kanë nisur nga minuta e parë secilën prej gjashtë ndeshjeve zyrtare të luajtura deri në këtë fazë.

Në këtë listë përfshihet Thibaut Courtois. Portieri belg vijon të paraqitet në një nivel shumë të lartë, ndonëse po i afrohet moshës 35-vjeçare.

Deri tani, Mourinho nuk duket se disponon një alternativë për ta pushuar Courtois, i cili vazhdon të jetë një nga garancitë më të mëdha të formacionit madrilen.

Pjesë e pesëshes janë gjithashtu tre futbollistët me rol kryesor në fazën sulmuese: Kylian Mbappe, Jude Bellingham dhe Vinicius Junior.

Francezi dhe anglezi e kanë filluar sezonin në mënyrë të shkëlqyer. Mbappe numëron shtatë gola dhe një asistim, kurse Bellingham ka regjistruar tre gola dhe tri asistime.

Vinicius, nga ana tjetër, ende po përpiqet të rigjejë formën optimale dhe vetëbesimin. Kritikat dhe vërshëllimat e tifozëve nuk e kanë ndryshuar qëndrimin e Mourinhos, i cili duket i vendosur t’ia ruajë besimin sulmuesit brazilian.

Emri i pestë është Federico Valverde, i cili e mbylli sezonin 2025/26 mes dyshimeve të shumta.

Përplasja me Aurelien Tchouamenin e kishte ndikuar ndjeshëm mesfushorin uruguaian, duke cenuar edhe pozicionin e tij brenda skuadrës.

Mourinho, megjithatë, ka mundur ta lërë pas atë situatë dhe t’ia rikthejë Valverdes peshën që kishte në formacion.

Aktivizimi si titullar në të gjitha ndeshjet e luajtura deri më tani dëshmon se uruguaiani mbetet ndër futbollistët që gëzojnë besimin më të madh të trajnerit portugez.

Në këtë mënyrë, Courtois, Mbappe, Bellingham, Vinicius dhe Valverde po formojnë boshtin fillestar të Real Madridit të Mourinhos. Të paktën në këtë pjesë të sezonit, këta janë pesë lojtarët që tekniku portugez i sheh si të paprekshëm.