Pavarësisht shqetësimit në kyçin e këmbës, Odegaard pjesë e Norvegjisë për ndeshjen me Uellsin

Martin Odegaard është futur në listën prej 23 lojtarësh të Norvegjisë për takimin e së enjtes kundër Uellsit në Ligën e Kombeve, edhe pse ka pasur shqetësime të fundit në kyçin e këmbës.

Kapiteni i Arsenalit u lëndua pas një ndërhyrjeje të vonuar të Bernardo Silvës në disfatën e Norvegjisë kundër Portugalisë.

Odegaard e la fushën duke çaluar dhe u shpreh shumë i indinjuar nga ajo ndërhyrje, të cilën e quajti një veprim që “nuk ka vend në një fushë futbolli”.

Kontrollet mjekësore kanë treguar se nuk bëhet fjalë për një lëndim serioz.

Sidoqoftë, trajneri i Norvegjisë, Stale Solbakken, ka bërë të ditur se nëse mesfushori do të aktivizohet apo jo, kjo do të vendoset vetëm pas testeve përfundimtare.

“Do të doja të thoja po, por nuk e di. Çështja është nëse ai është 100 për qind. Nëse ndihet në gjendje të luajë me këtë shqetësim”, deklaroi Solbakken.

Pavarësisht kësaj gjendjeje, nuk ka plane që Odegaard të largohet më herët nga grumbullimi dhe të kthehet te Arsenali.

Nëse nuk shfaqen probleme të reja, 27-vjeçari pritet të qëndrojë me Norvegjinë edhe për ndeshjen e së dielës ndaj Portugalisë.