Pas eliminimit nga Norvegjia, Brazili kthehet në Rio vetëm me Danilon nga kombëtarja

Humbja befasuese 1-2 ndaj Norvegjisë në fazën e 1/8-tës i mbylli në mënyrë të parakohshme shpresat e Brazilit për triumf në Kupën e Botës, ndërsa menjëherë pas eliminimit përfaqësuesja pothuajse u shpërnda.

Të dielën në mbrëmje, futbollistët morën leje dhe u nisën drejt destinacioneve të ndryshme nëpër botë. Sipas gazetës AS, në avionin që mori rrugën për në Rio de Janeiro bashkë me pjesën tjetër të delegacionit ndodhej vetëm një lojtar, mbrojtësi Danilo.

Vëmendje të madhe tërhoqi pikërisht ky kthim i veçantë, pasi vetëm një futbollist u rikthye në Brazil me delegacionin. Danilo aktivizohet si mbrojtës te Flamengo.

Lojtarët që janë pjesë e klubeve evropiane i nisën pushimet e tyre shumë më herët nga sa ishte parashikuar. Ndërkohë, futbollistët që luajnë në kampionatin brazilian kanë përfituar një javë pushim përpara se të rikthehen te skuadrat e tyre dhe te garat vendase.

Gjatë karrierës së tij, Danilo ka luajtur për Santosin, Porton, Real Madridin, Manchester Cityn dhe Juventusin. Në Kupën e Botës, ai u fut në lojë në pushimin mes pjesëve në ndeshjen e parë dhe më pas ishte në fushë në të katër takimet e tjera.

Në të njëjtin fluturim me Danilon ishin edhe pjesëtarë të stafit të trajnerëve, si dhe punonjës të ngarkuar me role të ndryshme gjatë kampionatit. Bashkë me ta udhëtoi edhe portieri Leo Nannetti, i cili nuk ishte përfshirë në listë, por kishte marrë pjesë në çdo seancë stërvitore për të ndihmuar në aktivitetet e ekipit.