Nuk kemi bërë keq, dhamë gjithçka”/ Ilir Daja pas humbjes me Teutën: Nuk ka arsye për shqetësim

Dinamo pësoi disfatën e dytë radhazi në kampionatin e Superiores, këtë herë përballë Teutës së drejtuar nga Edlir Tetova. Ky rezultat i largon edhe më shumë dinamovitët nga kreu dhe shton pikëpyetjet për objektivin e titullit. Në përfundim të takimit, trajneri Ilir Daja u shpreh se skuadra e tij nuk kishte arsye për alarm.

“Nuk ka vend për shqetësim, pasi situata të tilla janë pjesë e futbollit. Mendoj se sot nuk bëmë një ndeshje të keqe. Nëse e analizojmë takimin nga minuta e parë deri në fund, ajo që na mungoi ishte pasimi vendimtar”, tha Daja.

Trajneri theksoi se mungesat në formacion ndikuan në mënyrën e lojës së Dinamos, duke përmendur kapitenin Dita dhe Sembenen. Sipas tij, prania e Ditës do t’i jepte ekipit më shumë qetësi, ndërsa do të forconte edhe lojën në ajër.

“Kemi disa lojtarë jashtë, mes tyre edhe kapitenin Dita. Ai na sjell qetësi dhe më shumë forcë në duelet ajrore. Nëse Dita ose Sembene do të ishin në fushë, ndoshta do ta kishim zhvilluar ndeshjen në një mënyrë tjetër”, u shpreh ai.

Daja shpjegoi gjithashtu se skuadra kishte përgatitur një plan të veçantë për të neutralizuar manovrat e Teutës nga krahët drejt qendrës. Për këtë arsye, ai vlerësoi se Dinamo nuk kishte bërë një paraqitje të dobët, pavarësisht humbjes.

“E dinim mënyrën se si Teuta kalon nga krahët në qendër dhe për këtë kishim zgjedhur një organizim tjetër. Prandaj them se nuk bëmë keq. Pas çdo humbjeje duhet bërë analiza, por lojtarëve u thashë se dhanë maksimumin”, deklaroi trajneri i Dinamos.

Sipas tij, ekipi duhet të përmirësojë disa aspekte konkrete në ndeshjet e ardhshme, veçanërisht pasimin e fundit, edhe pse disa herë arriti ta dërgonte topin pranë zonës fundore.

“Në të ardhmen duhet të korrigjojmë dy ose tre gjëra. Në disa raste shkuam me topin deri në zonën fundore, por na mungoi pasimi i fundit. Në këtë aspekt kemi alternativa si Hoxhallari dhe Neziri”, u shpreh Daja.

Ai shtoi se një grup më i plotë lojtarësh do t’i krijonte më shumë mundësi për rotacion, ndërsa vlerësoi se Ismaili nuk ishte mjaftueshëm i saktë në pasimin përfundimtar.

“Kur ke më shumë zgjedhje, mundësitë për rotacion janë më të mëdha. Në pasimin e fundit, Ismaili nuk ishte aq efikas”, tha trajneri.

Në fund, Daja komentoi edhe numrin e faulleve të shkaktuara gjatë sfidës, duke theksuar se Dinamo nuk qëndroi pasive ndaj kundërshtarit.

“Nëse shohim faullet, në raport me kundërshtarin, ata ishin shumë më të shumtë dhe në dëmin tonë. Megjithatë, edhe ne u kundërpërgjigjëm dhe nuk qëndruam pasivë në fushë”, përfundoi Ilir Daja.