Nga bashkimi i shqiptarëve te fitoret në Australi, rrugëtimi i ekipit “UÇK” në Sydney

Në Sydney të Australisë, një skuadër futbolli e ngritur nga shqiptarët mban emrin “UÇK” dhe po shënon fitore e po fiton trofe në futbollin australian. Për këtë ekip, përballjet nuk zhvillohen me armë, por në fushën e lojës.

Emri i tij lidhet me Ushtrinë Çlirimtare të Kosovës, e cila u themelua për të mbrojtur popullin e Kosovës nga gjenocidi serb. Shqiptarët që krijuan skuadrën në Australi kanë një lidhje të fortë me UÇK-në e Kosovës.

Për mënyrën se si u hodhën themelet e këtij ekipi dhe për përvojat e tij, përfaqësuesja Leonora Toska ka folur për Telegrafin. Sipas saj, nisma mori jetë kur shqiptarët që jetojnë atje vendosën të bashkoheshin rreth futbollit.

Toska e përshkroi këtë bashkim duke e krahasuar me atë të shqiptarëve nga të gjitha trojet në UÇK, duke përmendur Iliridën, Dardaninë dhe Shqipërinë, si edhe shqiptarët kudo që ndodhen. Ajo solli gjithashtu në vëmendje formimin e Ilirdës, duke thënë se e njëjta frymë bashkimi i kishte udhëhequr edhe në krijimin e skuadrës në Australi.

Për të ilustruar prejardhjen e ndryshme të anëtarëve të ekipit, ajo tregoi se vetë është nga Struga, ndërsa trajneri dhe një menaxher tjetër janë nga Shqipëria. Siç theksoi Toska, të gjithë janë shqiptarë.

Zgjedhja e emrit, sipas përfaqësueses së skuadrës, nuk erdhi pas diskutimesh të gjata. Pasi u mblodhën për të ngritur një ekip, vendosën ta quanin “UÇK”. Ajo shprehu dashurinë e madhe që kanë për UÇK-në dhe tha se të gjithë kishin luftuar përkrah saj. Toska shtoi se regjistrimi i skuadrës me këtë emër nuk hasi asnjë vështirësi në Australi.

Gjatë bisedës, ajo u pyet edhe nëse ishin përballur me futbollistë apo skuadra serbe. Toska konfirmoi se kishte pasur raste të tilla dhe rrëfeu një incident që lidhej me djalin e saj, të cilin serbët e kishin pritur të dilte nga dhoma e zhveshjes për ta sulmuar.

Sipas rrëfimit të saj, djali luan me një skuadër në ligën vendase dhe, gjatë një ndeshjeje kundër një ekipi serb, realizoi tre gola. Pas secilit prej tyre, ai festoi duke bërë shqiponjën.

Toska tha se përfundimi i takimit u shoqërua me një rrëmujë të madhe dhe se mes atyre që prisnin jashtë dhomës së ndërrimit djalin e saj kishte edhe prindër serbë. Ajo tregoi se reagimet e urrejtjes nuk u kufizuan te ajo ngjarje, por vijuan edhe në Instagram dhe në rrjete të tjera sociale.