Nëse flas, rrezikoj pezullimin”: Mourinho nuk doli në konferencën për shtyp

Pas fitores dramatike 1-0 të Real Madridit ndaj Villarrealit në Santiago Bernabeu, Jose Mourinho vendosi të mos paraqitej para gazetarëve.

Mediumi “El Mundo” raporton se trajneri portugez druhej se komentet për gjykimin mund t’i sillnin pezullim në dy ndeshjet e ardhshme të La Ligës, kundër Sevillas dhe Barcelonës.

Gazetarët e pritën në sallën e konferencave të Santiago Bernabeut për deklaratat e zakonshme pas ndeshjes, por Mourinho nuk u shfaq.

Mungesa e tij erdhi pas një pjese të dytë të tensionuar, të shoqëruar me polemika për vendimet e arbitrit. Vinicius Junior mori karton të kuq për sjellje të dhunshme, pas një incidenti ku, sipas raportimeve, i tërhoqi flokët kundërshtarit jashtë aksionit të lojës.

Real Madridi pritet ta çojë më tej çështjen, pasi synon të paraqesë ankesë zyrtare për gjykimin në këtë ndeshje.

Për të mos bërë deklarata që mund të interpretoheshin si kritika ndaj arbitrave dhe të sillnin masa disiplinore, Mourinho zgjodhi të mos fliste.

Mundësia për të drejtuar skuadrën nga stoli në ndeshjet e radhës ka rëndësi të veçantë për portugezin: Real Madridi do të luajë fillimisht me Sevillan e më pas me Barcelonën, në një prej përballjeve më të mëdha të futbollit spanjoll.