Mourinho i kërkon Real Madridit afrimin e një tjetër emri të madh nga Liga Premier

Jose Mourinho, sipas raportimeve, i ka bërë një kërkesë të drejtpërdrejtë Real Madridit për të afruar edhe një tjetër yll nga Liga Premier, pasi klubi ka siguruar tashmë Marc Cucurellan, Ibrahima Konaten dhe Bernardo Silvën.

Që në ditët e para pas rikthimit të tij në stolin e “Santiago Bernabeu” në fillim të këtij muaji, trajneri portugez ka lëvizur shpejt për t’ia bërë të qarta klubit prioritetet e tij në afatin kalimtar.

Pas rizgjedhjes së presidentit afatgjatë Florentino Perez, Real Madridi hodhi në tavolinë një ofertë prej 152 milionë eurosh për sulmuesin e Atletico Madridit, Julian Alvarez, por ajo u refuzua menjëherë.

Ndërkohë që çështja e Alvarezit pritet të mbetet e hapur gjatë verës, skuadra madrilene ka zyrtarizuar tashmë afrimet e Cucurellas nga Chelsea dhe Konates nga Liverpooli.

Sipas mediumit spanjoll Marca, Mourinho i ka kërkuar personalisht klubit që të transferojë mesfushorin e Chelseat, Enzo Fernandez, çka mund ta shtojë edhe më tej numrin e ish-lojtarëve të elitës angleze në ekip gjatë kësaj vere.

Fernandez, që është i lidhur me klubin londinez me kontratë deri në vitin 2032, vlerësohet nga Chelsea në rreth 140 milionë euro.

Mes emrave në listën e objektivave është edhe mesfushori i West Hamit, Mateus Fernandes, për të cilin interes kanë shfaqur edhe Tottenhami dhe Manchester Unitedi. Sidoqoftë, në këtë moment duket e vështirë që Real Madridi të arrijë të transferojë të dy futbollistët.

Më herët ishte raportuar se Chelsea dhe Real Madridi kishin hapur bisedime për një kalim të mundshëm të Fernandezit në Spanjë.

Megjithatë, sipas Daily Mail, burime pranë situatës kanë bërë të ditur se deri tani nuk ka pasur kontakte zyrtare mes dy klubeve.

Chelsea mbetet në pritje të një oferte nga Real Madridi, ndërsa besohet se marrëveshja për kushtet personale me lojtarin nuk do të paraqesë vështirësi.