Mesazhi i ashpër i Tuchel zbardhet nga specialistja e leximit të buzëve: “Kjo është mundësia juaj e fundit”

Gjatë ndeshjes çerekfinale të Kupës së Botës përballë Norvegjisë, trajneri i Anglisë, Thomas Tuchel, u shfaq tejet i nervozuar me futbollistët e tij. Një analiste e gjuhës së trupit dhe leximit të buzëve, Nicola Hickling, ka deshifruar porositë që tekniku gjerman u përcolli lojtarëve në një moment delikat të sfidës.

Sipas zbërthimit të Hickling, Tuchel përfitoi nga pauza e hidratimit në fraksionin e parë të lojës për të shprehur pakënaqësinë ndaj ekipit, i cili megjithëse kontrollonte topin, nuk arrinte të krijonte raste konkrete shënimi.

Fjalët e tij të raportuara ishin këshilla të drejtpërdrejta: “Rritni intensitetin. Lëvizni më shpejt. Nuk po tregoni dinamizëm, jeni të ngurtësuar. Dëgjoni udhëzimet e stafit. Duhet të angazhohemi fizikisht për duelet. Topin mbajeni në tokë”.

Ai vijoi më tej: “Më pak kontakte fizike të panevojshme, përqendrohuni tek topi. Në korne, sulmoni nga krahu i djathtë. Mos hyni ballazi. Pozicioni optimal është në të djathtë, kjo dihet. Sa herë që veproni nga qendra, topi humbet. Qëndroni në krahun e djathtë. Kërkoj forcë maksimale nga secili. Kjo është mundësia juaj e fundit. Nëse dështojmë, jemi jashtë. Përpara, le të vazhdojmë!”.

Por thirrjet e tij nuk sollën ndryshim të menjëhershëm. Vetëm disa minuta më pas, një gabim i John Stones në zonën e tij u shndërrua në gol për norvegjezët, me Andreas Schjelderup që zhbllokoi shifrat.

Skuadra angleze reagoi shpejt përpara se të mbyllej pjesa e parë, kur Jude Bellingham rivendosi baraspeshën pas një tranzicioni të shpejtë.

Në fraksionin e dytë, sërish Bellingham doli në skenë duke gjetur golin e fitores dhe duke i hapur rrugën Anglisë për në gjysmëfinale.

Edhe pse kualifikimi u sigurua, Tuchel nuk e fshehu pakënaqësinë për atë që pa në fushë. “Patëm fat. E vështirësuam vetë situatën në mënyrë të panevojshme. Rezultati përfundimtar është i mrekullueshëm sepse na dërgon në gjysmëfinale, por loja nuk më kënaqi aspak”.

“Përkushtimi ishte i pranishëm, por mënyra se si u shprehëm në fushë ishte e dobët. Bëmë gabime në aspektin taktik, lëvizjet tona ishin të ngadalta dhe nuk arritëm të gjeneronim ritmin e nevojshëm. Jemi me fat që shpëtuam”, përfundoi trajneri.