Tuchel u përgjigjet kritikëve pas humbjes ndaj Argjentinës: Nuk pendohem për zgjedhjet e mia

Trajneri i Anglisë, Thomas Tuchel, ka dalë në mbrojtje të vendimeve të tij pas humbjes dramatike ndaj Argjentinës në gjysmëfinalen e Kupës së Botës, duke iu përgjigjur me ironi zërave kritikë.

“Tre Luanët” u mundën 2-1, edhe pse kishin kaluar fillimisht në avantazh. Argjentina e përmbysi rezultatin në minutat e fundit, duke siguruar kështu biletën për finalen e madhe kundër Spanjës.

Pas ndeshjes, tekniku gjerman vlerësoi se është shumë e thjeshtë të analizohen dhe kritikohen zgjedhjet e trajnerit pasi rezultati nuk ka shkuar në favor të skuadrës.

“Ka miliona trajnerë pas ndeshjes që e dinë se çfarë duhej bërë më mirë”, deklaroi fillimisht Tuchel me tone ironike.

Ai bëri të qartë se nuk ndien pendesë për qasjen taktike të zgjedhur, pavarësisht reagimeve që pritet të pasojnë eliminimin e Anglisë.

“Është e lehtë të thuash se vendimet e mia ishin të gabuara pasi gjërat nuk shkuan mirë”.

Tuchel insistoi se Anglia paraqiti një nivel shumë të lartë loje dhe, sipas tij, skuadra nuk e meritonte të largohej nga turneu në këtë fazë.

“Nuk kam asnjë pendesë. Zhvilluam një nga ndeshjet tona më të mira, në mos më të mirën”, përfundoi ai.

Pas eliminimit, Anglia do ta përfundojë Kupën e Botës me përballjen për vendin e tretë ndaj Francës. Ndërkohë, Argjentina do të kërkojë ta mbrojë titullin në finalen kundër Spanjës.//