Mbappe vendos rekorde të reja në Kupën e Botës, francezi lë pas edhe emra legjendarë

Kylian Mbappe po vazhdon të lërë gjurmë në historinë e futbollit botëror. Sulmuesi i Francës shënoi dy herë në suksesin 3-0 përballë Suedisë, duke regjistruar arritje të reja në Kupën e Botës.

Goli i parë në këtë takim e çoi Mbappen në nëntë realizime në ndeshjet me eliminim direkt të Kupës së Botës, çka e bëri atë golashënuesin më të mirë në historinë e kësaj faze të turneut.

Para këtij momenti, ai e mbante së bashku këtë rekord me dy ikonat braziliane, Leonidas dhe Ronaldo Nazario, që kishin shënuar nga tetë gola secili. Por francezi shkoi edhe më tej, pasi me golin e dytë ndaj Suedisë e ngriti totalin në 10 gola në fazat eliminatore.

Falë këtyre dy golave, Mbappe u ngjit edhe në vendin e dytë në renditjen e golashënuesve më të spikatur në historinë e Kupës së Botës. Tashmë ai ka 18 gola në kompeticionin më të madh të futbollit, duke kaluar legjendën gjermane Miroslav Klose.

I vetmi që qëndron ende mbi të është Lionel Messi. Kapiteni i Argjentinës ka zhvilluar një Kupë Bote 2026 të jashtëzakonshme, duke shënuar një “hat-trick” ndaj Algjerisë, dy gola kundër Austrisë dhe një tjetër përballë Jordanisë në fazën e grupeve.

Messi mban aktualisht vendin e parë me 19 gola, por forma që po tregon Mbappe bën që rekordi i argjentinasit të duket seriozisht i kërcënuar.