Manchester United i ofroi privilegje të veçanta 16-vjeçarit JJ Gabriel për ta mbajtur në klub

Manchester United ka ndërmarrë hapa të shumtë për të bindur JJ Gabrielin të vazhdojë karrierën në klub, por sulmuesi anglez duket se ka orientuar të ardhmen drejt Real Madridit.

Sipas gazetës The Sun, klubi i ka propozuar familjes së futbollistit një lozhë VIP në stadiumin e ri, në përpjekje që ai të mos largohet gjatë afatit kalimtar të janarit 2027.

Oferta përfshinte gjithashtu vazhdimin e kontratës, mundësinë e afrimit me ekipin e parë dhe fanellën me numrin 77. Manchester United shqyrtoi edhe krijimin e një strategjie tregtare të lidhur me imazhin e tij.

Klubi, që po ndërton një stadium të ri me kapacitet rreth 100 mijë vende, shpresonte se këto propozime do të bindnin lojtarin e akademisë dhe familjen e tij të qëndronin në Manchester.

Megjithatë, mosmarrëveshjet për zhvillimin e tij si futbollist e shtynë Gabrielin të kërkonte largimin në shtator, vetëm pak javë përpara se të mbushte 16 vjeç.

Mes mundësive të paraqitura nga United ishte edhe ftesa e mundshme për ndeshjen e Kupës së Ligës kundër Brightonit, e luajtur më 16 shtator. Ky propozim iu komunikua babait të lojtarit, Joe O’Cearuill, por Gabrieli kishte shprehur tashmë synimin për t’u larguar.

Pakënaqësisë së njerëzve pranë tij iu shtua edhe fakti që emri i tij nuk ishte përfshirë në listën kryesore të klubit për Ligën e Kampionëve.

Gabrieli shihet si një nga lojtarët e rinj më premtues të akademisë së Manchester Unitedit. Në debutimin në UEFA Youth League kundër Sabahut ai realizoi tre gola, ndërsa sezonin e kaluar u përzgjodh futbollisti më i mirë i Ligës Premier U-18.

Ndërkohë, Real Madridi po i afrohet marrëveshjes për ta marrë lojtarin. Në raportimet e publikuara më 4 nëntor, BBC Sport dhe Sky Sports bënë të ditur se klubi spanjoll ka arritur një dakordësi verbale me përfaqësuesit e Gabrielit për një transferim të mundshëm në janar 2027.

Ai nuk është stërvitur me Manchester Unitedin që prej shtatorit dhe po përgatitet për hapin e ardhshëm në karrierë, ku Spanja mund të jetë destinacioni i tij.

Real Madridi synon që fillimisht Gabrieli të luajë e të zhvillohet te Castilla, përpara se të kërkojë një vend në skuadrën e parë.

Largimi mund t’i sjellë Manchester Unitedit edhe humbje financiare: sipas vlerësimeve të publikuara në Angli, klubi mund të marrë vetëm rreth 400 mijë euro kompensim nëse futbollisti transferohet jashtë vendit.

Gjithsesi, marrëveshja nuk është finalizuar dhe procesi duhet të kalojë disa hapa të rëndësishëm. Edhe pse Gabrieli ka dokumentacionin e një shtetasi të Bashkimit Evropian, transferimi ndërkombëtar duhet të respektojë rregullat e FIFA-s për futbollistët e mitur.

Real Madridi nuk ka nisur ende bisedime zyrtare me Manchester Unitedin. Nga ana tjetër, klubi anglez po shqyrton mundësinë e ndjekjes së rrugës ligjore, nëse vëren shkelje gjatë procesit.

Pavarësisht ofertave të veçanta të Manchester Unitedit, largimi i JJ Gabrielit mbetet një mundësi konkrete dhe mund t’i sigurojë klubit anglez vetëm rreth 400 mijë euro.