Manchester City përgatit apelimin ndaj vendimit të Ligës Premier

Manchester City pritet të apelojë vendimin që lidhet me pagesat e sponsorizimeve, duke këmbëngulur se fondet e shqyrtuara janë siguruar nga qeveria e Abu Dhabit dhe jo nga pronarët e klubit.

Sipas “Daily Mail”, mbrojtja e klubit do të mbështetet te dokumentet bankare të qeverisë dhe dëshmitë e dëshmitarëve. Këto materiale, sipas Cityt, dëshmojnë se pagesat janë kryer nga sponsori, qeveria e Abu Dhabit, dhe jo nga Abu Dhabi United Group, grupi që kontrollon pronësinë e klubit dhe drejtohet nga Sheikh Mansour, njëkohësisht zëvendëspresident dhe zëvendëskryeministër i Emirateve të Bashkuara Arabe.

Manchester City është shpallur fajtor për marrjen e paligjshme të më shumë se 900 milionë funteve, me synimin për të shmangur rregullat financiare të Ligës Premier. Nga kjo vlerë, 830.69 milionë funte kanë të bëjnë me financime të fshehura përmes marrëveshjeve tregtare.

Klubi pritet të kundërshtojë edhe cilësimin e këtyre marrëveshjeve si “fiktive”. Në apel, City mund të argumentojë se Sheikh Mansour nuk kishte mundësi të mos ishte në dijeni për pagesa të një përmase kaq të madhe.

Apelimi pritet të përfshijë gjithashtu vonesën 20-mujore në publikimin e vendimit. Sipas Manchester Cityt, kjo periudhë e gjatë e ka bërë vendimin të pasigurt.

Afati i klubit për të paraqitur ankesën përfundon të premten. Rezultati i këtij procesi mund të ndikojë ndjeshëm në të ardhmen e Manchester Cityt dhe në sanksionet sportive me të cilat mund të përballet.