Manchester City apelon vendimin për shkeljet financiare: seanca pritet brenda 12 javësh

Manchester City bëri të ditur të premten se ka dorëzuar një apelim të plotë kundër vendimit të një komisioni të pavarur, i cili e shpalli klubin fajtor për shkelje të rregullave financiare të Ligës Premier.

Ligës Premier njoftoi të martën se komisioni i pavarur kishte konstatuar më shumë se 100 shkelje ndaj klubit të mbështetur nga Abu Dhabi.

Manchester City, 10 herë kampion i Anglisë, i ka kundërshtuar vazhdimisht të gjitha akuzat. Në deklaratën e publikuar të premten, klubi konfirmoi se ankesën e kishte paraqitur të enjten, një ditë përpara skadimit të afatit.

Sipas njoftimit zyrtar, Manchester City e dorëzoi në orën 19:00 të enjtes, më 1 tetor 2026, ankesën gjithëpërfshirëse kundër qëndrimit të komisionit të Ligës Premier lidhur me procedurën disiplinore.

Klubi pretendon se vendimi përmban gabime të rëndësishme materiale, ligjore, parimore dhe faktike, duke e cilësuar atë të pasigurt.

Manchester City këmbëngul se është i pafajshëm ndaj akuzave të Ligës Premier dhe se disponon prova të plota e të pakundërshtueshme në mbështetje të qëndrimeve të tij.

“Do të vazhdojmë ta respektojmë procesin e rregullt ligjor, ndërsa për momentin jemi të kufizuar në atë që mund të deklarojmë më tej, deri në përfundimin e të gjitha procedurave”, thuhej në fund të komunikatës.

Klubi pritet të mbështetet te grupi i provave që, sipas tij, do të vërtetojë pafajësinë. Një nga argumentet e mundshme është se marrëveshjet e sponsorizimit u financuan pjesërisht nga qeveria e Abu Dhabit dhe jo nga pronarët e klubit.

Rregullat e reja për procedurat e përshpejtuara të Ligës Premier parashikojnë që seanca e apelimit të zhvillohet brenda 12 javësh nga paraqitja e ankesës. Vendimi, ndërkohë, duhet të merret jo më vonë se 30 ditë pas përfundimit të seancës dëgjimore.

City pritet gjithashtu të kundërshtojë zbatimin e këtyre rregullave, duke argumentuar se ato nuk ishin në fuqi në shkurt të vitit 2023, kur akuzat u ngritën fillimisht.

Pasojat e mundshme për Manchester Cityn nuk lidhen vetëm me ndëshkimet sportive.

Ekspertët e së drejtës sportive kanë paralajmëruar se çështja mund të sjellë vite të tëra procesesh të tjera gjyqësore, ndërsa klubet rivale, futbollistët dhe agjentët po shqyrtojnë nëse kanë bazë për të kërkuar kompensim në lidhje me këtë rast.