Manchester City hap negociata me Real Madridin për Eduardo Camavingan

Manchester City ka hyrë konkretisht në garë për Eduardo Camavingan, ndërsa mesfushori francez mund të largohet nga Real Madridi gjatë këtij afati kalimtar veror.

Burime nga Spanja bëjnë të ditur se kontaktet e para mes kampionëve të Anglisë dhe klubit madrilen tashmë janë vendosur, me të dyja palët që po shqyrtojnë mundësinë e realizimit të marrëveshjes.

Sipas raportimeve, trajneri i Real Madridit, Jose Mourinho, nuk është plotësisht i kënaqur me paraqitjet e Camavingas në sezonet e fundit dhe nuk do ta pengonte një largim të tij gjatë kësaj vere.

Te Manchester City po vlerësohet seriozisht mundësia për të afruar 23-vjeçarin, i cili gëzon vlerësim të lartë në Ligën Premier për forcën fizike, energjinë dhe aftësinë për të luajtur në role të ndryshme në mesfushë.

Ekipi i Pep Guardiolës ka investuar tashmë ndjeshëm në këtë repart, pasi ka transferuar Elliot Anderson për rreth 135 milionë euro. “Qytetarët” kishin shfaqur interes edhe për mesfushorin italian Sandro Tonali, por ai pritet të kalojë te Tottenhami në një marrëveshje që do t’i sjellë Newcastle Unitedit mbi 100 milionë euro.

Në këtë situatë, drejtuesit e Real Madridit e konsiderojnë shitjen e Camavingas si një mundësi të favorshme financiare, duke pasur parasysh gatishmërinë e klubeve angleze për të investuar shuma të mëdha për lojtarë me profilin e tij.

Sipas të njëjtave burime, Mourinho synon që të ardhurat nga shitja e francezit t’i përdorë për të përforcuar skuadrën në dy poste që i sheh si prioritare: një mesfushor të ri dhe një mbrojtës qendre.

Objektivi kryesor për repartin defensiv mbetet Alessandro Bastoni, të cilin tekniku portugez e konsideron zgjedhjen ideale për të forcuar prapavijën e madrilenëve.

Nga ana tjetër, Manchester City nuk po fokusohet vetëm te Camavinga, pasi klubi anglez vazhdon të ndjekë edhe talentin maroken të Lille, Ayyoub Bouaddi.