Manchester City gjendet fajtor për shkeljet financiare, tani pritet vendimi për dënimin

Komisioni i Pavarur që shqyrtoi për një periudhë të gjatë çështjen financiare të Manchester Cityt ka arritur në përfundimin se klubi është përgjegjës për të gjitha akuzat kryesore lidhur me shkeljen e rregullave të Premier Ligës.

Sipas të dhënave të publikuara nga Premier Liga, shkeljet përfshijnë periudhën nga sezoni 2009/10 deri në sezonin 2017/18. Gjatë kësaj kohe, klubi dyshohet se ka përdorur disa marrëveshje komerciale “të rreme”, të cilat kanë fryrë artificialisht të ardhurat dhe kanë ulur në dokumente vlerën reale të kostove.

Vendimi i Komisionit përmend marrëveshje sponsorizimi në të cilat kompanitë përkatëse mbulonin vetëm një pjesë të shumës së deklaruar, ndërsa pjesa tjetër financohej nga Abu Dhabi United Group (ADUG), entiteti që zotëronte Manchester Cityn.

Sipas Komisionit, këto praktika kanë ndikuar drejtpërdrejt në mënyrën se si është pasqyruar pozicioni financiar i klubit.

Dokumentet e Premier Ligës bëjnë të ditur se, gjatë periudhës së hetuar, skemat synonin të rrisnin artificialisht të ardhurat dhe të ulnin kostot me më shumë se 900 milionë funte. Kjo do t’i mundësonte Manchester Cityt të paraqitej si klub në përputhje me rregullat financiare.

Komisioni ka gjetur gjithashtu se Manchester City kishte dorëzuar llogari të pasakta dhe nuk u kishte dhënë auditorëve e rregullatorëve të futbollit një pasqyrë të plotë të gjendjes së financave. Në vendim thuhet se, po të ishin raportuar saktë marrëveshjet, klubi do të kishte shkelur në mënyrë të konsiderueshme kufijtë e shpenzimeve të Premier Ligës dhe rregullat financiare të UEFA-s.

Hetimi ka evidentuar edhe shkelje të detyrimeve për bashkëpunim me Premier Ligën. Nga katër akuzat e ngritura për këtë çështje, Komisioni ka mbështetur tre prej tyre.

Drejtori ekzekutiv i Premier Ligës, Richard Masters, e përshkroi vendimin si një nga çështjet më të rëndësishme disiplinore në historinë e kompeticionit. Sipas tij, vendimi sqaron faktet mbi atë që ka ndodhur te Manchester City gjatë periudhës së shqyrtuar, ndërsa hapi i radhës është përcaktimi i masës ndëshkuese.

Dënimi ende nuk është përcaktuar. Premier Liga ka njoftuar se sanksioni do të diskutohet në një seancë të veçantë të Komisionit të Pavarur, e cila do të zhvillohet privatisht dhe në mënyrë konfidenciale deri në momentin që rezultati të mund të bëhet publik.

Manchester City mund ta apelojë vendimin deri më 2 tetor. Premier Liga synon që i gjithë procesi, duke përfshirë çdo apel dhe publikimin e vendimeve përkatëse, të mbyllet sa më shpejt të jetë e mundur.