Pas dy sezonesh në nivele të larta me Milanin në Serinë A, Theo Hernandez ia ka dalë të bindë trajnerin Didier Deschamps se e meriton një ftesë për në përfaqësuesen e Francës.
Tekniku i “gjelave” ka publikuar sot listën e futbollistëve që do të grumbullojë për eliminatoret e Kupës së Botës Katar 2022 në fillim të shtatorit, teksa mbrojtësi 24-vjeçar ka marrë për herë të parë ftesën për t’iu bashkuar përfaqësueses.
Ky do të jetë grumbullimi i parë i Francës pas një Europiani pa shkëlqim dhe pritet me mjaft interes reagimi në fushë i Kampionëve në fuqi të Botës, ndërsa risi në listën e Deschamps është edhe mungesa e sulmuesit Olivier Giroud e thirrja e mesfushorit të Romës, Jordan Veretout.
Franca kryeson grupin D të eliminatoreve me 7 pikë dhe do të luajë sfidën e parë ndaj Bosnjës & Hercegovinës më 1 shtator në Strasburg, më pas do të udhëtojë drejt Kievit për t’u përballur me Ukrainën më 4 shtator dhe tre ditë më vonë do të zbarkojë në Lyon për të pritur Finlandën.
