Lionel Messi njofton largimin nga Kombëtarja e Argjentinës

Pas më shumë se 20 vitesh të veshur me fanellën “Albiceleste”, Lionel Messi ka vendosur t’i japë fund aventurës së tij me Kombëtaren e Argjentinës. Ylli argjentinas e ka bërë të ditur se kapitulli i tij me përfaqësuesen po mbyllet.

Vendimi është komunikuar përmes një mesazhi emocional, në të cilin Messi pranon se bëhet fjalë për një zgjedhje të dhimbshme, por që ai e konsideron të marrë në kohën e duhur.

“Pas gjithë kësaj kohe që nga finalja dhe pasi e kam menduar shumë, dua t’ju njoftoj të gjithëve se po tërhiqem nga Kombëtarja”, shkruan Messi.

Ai shton: “Ka qenë një vendim që më ka dhembur dhe ende më dhemb thellë brenda meje, por e kuptoj se ky është momenti i duhur.”

Kapiteni i Argjentinës nënvizon se përfaqësueses i ka dhënë gjithçka gjatë gjithë karrierës së tij. Sipas tij, përkushtimi nuk ka munguar as në vitet e fundit, kur skuadra fitoi trofetë më të rëndësishëm, dhe as në periudhat më të vështira.

“Betohem se gjithmonë kam dhënë gjithçka, jo vetëm në këto vitet e fundit kur fituam gjithçka, por edhe më parë. Gjithmonë kam luftuar dhe kam dhënë gjithçka për këtë fanellë, për t’ju sjellë lumturi dhe për t’ju bërë krenarë që jeni argjentinas përmes futbollit”, shprehet ai.

Messi pranon se koha po ecën dhe se rrugëtimi i tij ndërkombëtar është pranë fundit.

“Nuk ka mbetur shumë kohë dhe kapituj të ndryshëm po mbyllen. Ky është një kapitull që më dhemb shumë. E dua, e kam dashur dhe do ta dua gjithmonë të qenit pjesë e Kombëtares. Kam dhënë gjithçka që kisha dhe nuk kam më shumë për të dhënë.”

Futbollisti argjentinas kujton gjithashtu se një brez i ri lojtarësh të talentuar po afrohet dhe se ata meritojnë të marrin vendin e tyre në përfaqësuese.

“Ka edhe shumë lojtarë të rinj dhe të talentuar që po vijnë dhe që e meritojnë të jenë këtu.”

“Tani do të jem një prej jush”

Mesazhi i tij përfshin edhe një falënderim për tifozët e Argjentinës, të cilët e kanë mbështetur gjatë 20 viteve të tij me Kombëtaren.

“Faleminderit për gjithë dashurinë gjatë këtyre 20 viteve. Do të më mungojë t’ju dëgjoj nga brenda. Tani do të jem një prej jush, gjithmonë duke mbështetur nga jashtë, në momentet e mira dhe akoma më shumë në ato të këqija.”

Një mirënjohje të veçantë Messi ia drejton familjes, trajnerëve, shokëve të skuadrës dhe drejtuesve që e shoqëruan në këtë rrugëtim.

“Faleminderit familjes sime që ka qenë gjithmonë aty për mua dhe që më ka shoqëruar gjatë këtij rrugëtimi të bukur, por edhe të vështirë. Faleminderit çdo trajneri, shoku skuadre dhe drejtuesi me të cilët pata mundësinë ta ndaj këtë përvojë. Me vete marr kujtime dhe momente të paharrueshme.”

Ai largohet nga Kombëtarja me krenari për arritjet e tij me Argjentinën, veçanërisht për sukseset e mëdha të viteve të fundit.

“Largohem i qetë dhe krenar, duke e ditur se së bashku me shokët e skuadrës ju dhamë momente që dikur i kishim ëndërruar. Ishte çmenduri ta përjetoja gjithë këtë me ju. Ju dua!”

Në përmbyllje, Messi falënderon Zotin për mundësinë që i dha të lindte argjentinas.

“Faleminderit Zotit që më bëri argjentinas. Vamos Argentina!”

“Pas asaj që ndodhi me babain tim, jam edhe më i bindur”.

Messi bën me dije se vendimin për tërheqjen e kishte marrë vetëm dy ditë pas finales.

“I shkrova këto fjalë më 21 korrik, dy ditë pas finales. Sot, pas asaj që ndodhi me babain tim, jam edhe më i bindur për këtë vendim sesa më parë.”

Pas 20 vitesh me Kombëtaren e Argjentinës, një prej kapitujve më të rëndësishëm në historinë e futbollit duket se po merr fund.