Kroatët dhe anglezët bashkohen në tribuna me një protestë të pazakontë në Botëror

Kroacia e hapi me disfatë rrugëtimin e saj në Kupën e Botës 2026, teksa në ndeshjen e parë të Grupit L, të luajtur në Dallas, u mund 4-2 nga Anglia. Edhe pse kroatët arritën të rikthenin baraspeshën dy herë gjatë pjesës së parë, anglezët u treguan më dominues pas pushimit dhe morën tre pikët.

Skuadra angleze kaloi e para në avantazh në minutën e 12-të, kur Harry Kane shënoi nga penalltia. Përgjigjja e Kroacisë erdhi shpejt, me Martin Baturinën që realizoi për 1-1 pas një asistimi shumë të mirë nga Petar Sučić. Në prag të fundit të pjesës së parë, Kane gjeti sërish rrugën e rrjetës me kokë pas një goditjeje nga këndi, por Petar Musa vendosi sërish ekuilibrin me golin e 2-2.

Në fraksionin e dytë të lojës, Anglia mori kontrollin dhe e mbylli takimin në favorin e saj falë golave të Jude Bellingham dhe Marcus Rashford, duke bërë që Kroacia ta nisë Botërorin pa asnjë pikë.

Jashtë asaj që ndodhi në fushë, një tjetër moment që tërhoqi vëmendjen ishte sjellja e tifozëve në shkallët e stadiumit. Mbështetësit e Kroacisë dhe ata të Anglisë, të cilët kishin kaluar të gjithë ditën së bashku pa incidente, kontribuuan në krijimin e një atmosfere shumë të mirë në Dallas.

Megjithatë, në minutën e 22-të, pasi arbitri francez Clement Turpin e ndali ndeshjen për një pushim freskimi, në tribuna shpërthyen fishkëllima të shumta. Tifozët e të dyja përfaqësueseve shfaqën pakënaqësinë ndaj këtyre ndërprerjeve të detyruara, të cilat sipas shumë prej tyre e dëmtojnë ritmin e lojës dhe ndikojnë keq në zhvillimin e ndeshjeve.

Ky reagim i përbashkët i tifozëve të Kroacisë dhe Anglisë u kthye në një nga episodet më të veçanta të mbrëmjes, duke dëshmuar se kundërshtarët në fushë mund të qëndrojnë në një vijë kur vjen puna te mbrojtja e asaj që ata e shohin si fryma e futbollit.