Kriza te Fenerbahçe thellohet, Ismail Kartal ndërpret kontaktet pas deklaratave të Aziz Yıldırım

Situata te Fenerbahçe është përkeqësuar ndjeshëm, pasi Ismail Kartal nuk është paraqitur në stërvitjen e ekipit dhe, sipas raportimeve nga Turqia, ka ndërprerë komunikimin me drejtuesit e klubit.

Gazetari Yagiz Sabuncuoglu ka bërë të ditur se trajneri turk e ka fikur telefonin dhe aktualisht nuk mund të kontaktohet nga drejtuesit e Fenerbahces.

Mungesa e Kartalit krijoi një situatë të pazakontë në skuadër, ndërsa seanca stërvitore u drejtua nga Dirk Kuyt dhe Zeki Gole.

Ky zhvillim vjen pavarësisht deklaratave të presidentit Aziz Yıldırım, i cili kishte theksuar publikisht se Kartal vazhdon të jetë trajner i Fenerbahçes. Sipas tij, tekniku është nën stres, por duhet të qëndrojë në detyrë dhe të vazhdojë punën.

Kartal e kishte paralajmëruar largimin pas barazimit 1-1 me Romën në Ligën e Kampionëve. Përveç rezultatit, ai ishte revoltuar edhe nga një incident gjatë ndeshjes, kur një tifoz e goditi në kokë me shishe nga tribunat.

Trajneri ishte përballur gjithashtu me presion për shkak të paraqitjeve jo bindëse të ekipit në javët e para të sezonit të kampionatit turk.

Megjithatë, sjellja e tij e fundit nuk përputhet me deklaratat e presidentit. Mosprania në stërvitje dhe mbyllja e kanaleve të komunikimit janë sinjale se qëndrimi i Kartalit për të ardhmen e tij mund të ketë mbetur i pandryshuar.

drejtuesit e Fenerbahçes pritet të përpiqen ta kontaktojnë trajnerin për të zhvilluar një takim urgjent dhe për të marrë një vendim përfundimtar rreth qëndrimit të tij në stol.