Dorëheqje e papritur te Fenerbahçe, Ismail Kartal largohet pas barazimit me Romën

Ismail Kartal nuk do të jetë më trajner i Fenerbahçes. Ai njoftoi dorëheqjen pas përballjes me Romën në Ligën e Kampionëve, ku skuadra turke mori një pikë pas barazimit 1-1, pavarësisht paraqitjes së mirë.

Pas përfundimit të ndeshjes, Kartal fillimisht u ndal te performanca e ekipit të tij. Ai tha se Fenerbahçe kishte zbatuar një përgatitje të duhur për takimin kundër një kundërshtari të fortë si Roma.

Pak çaste më vonë, trajneri bëri të ditur vendimin e papritur për t’u larguar nga drejtimi i klubit, duke nënvizuar se dorëheqja e tij ishte përfundimtare.

“Po jap dorëheqjen nga pozicioni im. Po jap dorëheqjen sa ka ende kohë. Po jap dorëheqjen me mirëkuptimin se nuk do të kthehem më kurrë”, tha Kartal.

Ai bëri të ditur se kishte qëndruar në krye të Fenerbahçes vetëm për tre muaj, ndërsa shprehu mirënjohjen ndaj drejtuesve të klubit për mbështetjen e dhënë gjatë kësaj kohe.

“Kam qenë këtu për tre muaj. Që nga fillimi i sezonit deri më tani, seancat stërvitore dhe kampet që kam zhvilluar me lojtarët e mi… Presidenti dhe menaxherët tanë janë përpjekur të na ndihmojnë në çdo mënyrë. Ishin ditë të mrekullueshme. Që nga kjo mbrëmje, i përgëzoj lojtarët e mi dhe po jap dorëheqjen nga pozicioni im”, përfundoi ai.

Largimi i Kartalit vjen në një periudhë të papritur për Fenerbahçen, e cila sapo ka nisur pjesëmarrjen në fazën e ligës së Ligës së Kampionëve dhe e çeli këtë aventurë me një barazim ndaj Romës.